ეს არის მორიგი აღიარება, აქ უკვე ახალი არაფერია, სახეები უკვე ცნობადია, – ასე გამოეხმაურა ჟურნალისტებთან საუბრისას პოლიტიკური ჯგუფის, „ხალხის ძალის“ თავმჯდომარე დიმიტრი ხუნდაძე რუს „პრანკერებთან“ სალომე ზურაბიშვილის მიერ გაკეთებულ განცხადებებს.
დიმიტრი ხუნდაძის თქმით, მათი მიზანიც უკვე დიდი ხნის ნაცნობია საზოგადოებისთვის.
„გაშიფრულები არიან, მაგრამ მათთვის ძალიან ბევრი მეხი გავარდა. მაგალითად ის, რომ საქართველოს წარმომადგენლობა ვიცე-პრემიერის ხელმძღვანელობით სახელმწიფო დეპარტამენტში მართავს შეხვედრებს. ის, რომ ეუთოს გენმდივანი ჩამოვიდა საქართველოში და ქართულ მხარესთან პოზიტიური ურთიერთობისთვის გამოხატა მადლიერება“, – აღნიშნა დიმიტრი ხუნდაძემ.
ცნობისთვის, რუსი „პრანკერები“ გადაცემა „ანტი-ფეიკში“ გამოჩნდნენ, რომელშიც განაცხადეს, რომ ამჯერად მათი მიზანი იყო გარკვეულიყვნენ რა იყო საქართველოში მიმდინარე აქციებისა და არეულობის მიზეზი. ამ მიზნით კი მათ ზურაბიშვილთან და ნანუაშვილთან გასაუბრება გადაწყვიტეს. გადაცემაში ჩანაწერის ნაწყვეტები გავიდა.
სალომე ზურაბიშვილი რუსი „პრანკერების“ მახეში გაება. ზურაბიშვილი აღიარებს, რომ უცხოეთიდან ფინანსდება და ახლა ევროპიდან თანხის გაჭიანურებაზე დარდობს. ფინანსებს ითხოვს უჩა ნანუაშვილიც.