ამერიკის ეროვნული დაზვერვის დირექტორი, ტულსი გაბარდი აცხადებს, რომ, ამერიკის პრეზიდენტის, დონალდ ტრამპის ძალისხმევით, შეერთებული შტატები უკრაინაზე დახარჯულ თანხას უკან დაიბრუნებს.
გაბარდის თქმით, კიევთან გაფორმებული ძვირფასი წიაღისეულის შეთანხმება, პირველ რიგში, ამერიკელი ხალხის ინტერესებს ემსახურება და ის ასევე სასარგებლოა უკრაინელებისთვისაც.
ეროვნული დაზვერვის დირექტორი განმარტავს, რომ ჯო ბაიდენის ადმინისტრაციამ ამერიკელი ხალხის კუთვნილი 350 მილიარდი დოლარი უკრაინას მოახმარა და ეს დახმარება უნდა ანაზღაურდეს.
„უკრაინაში რუსეთის შეჭრის შემდეგ ამერიკისგან კიევისთვის გაწეული დახმარება 350 მილიარდ დოლარს შეადგენს. ევროპული ქვეყნები უკრაინის დასახმარებლად საკუთარი გადამხდელების ფულს კი არ აგზავნიან, არამედ გაყინულ რუსულ აქტივებს იყენებენ გარანტიად, ან უკრაინას ეუბნებიან: „მოგცემთ ფულს და შემდეგ დაბრუნების გეგმას შევიმუშავებთ“. ჩვენ კი უბრალოდ მივეცით ფული. პრეზიდენტი ტრამპი შეშფოთდა იმით, რომ ამერიკელი ხალხი უკან ვერაფერს მიიღებდა. სწორედ ამ შეთანხმებით დაიბრუნებს ამერიკელი ხალხი იმ თანხას, რაც მთავრობამ სხვა ქვეყნის შეიარაღებასა ან ინფრასტრუქტურის აღდგენაში დახარჯა“, – თქვა გაბარდმა.