აშშ-ის პრეზიდენტმა, დონალდ ტრამპმა ციხეების ფედერალურ ბიუროს ცნობილი ციხის, ალკატრასის, რომელიც სან-ფრანცისკოს ყურეში მდებარეობს, რეაბილიტაცია და თავიდან გახსნა დაავალა. ინფორმაციას Reuters-ი ავრცელებს.
როგორც სააგენტო აღნიშნავს, ალკატრასის ციხეში ისეთი ცნობილი ბოროტმოქმედებები იხდიდნენ სასჯელს, როგორიც იყო ალ კაპონე. ციხე 1963 წელს დაიხურა და სან-ფრანცისკოს ერთ-ერთ ტურისტულ ღირსშესანიშნაობად იქცა.
„დღეს მე ვავალებ ციხეების ბიუროს იუსტიციის დეპარტამენტთან, გამოძიების ფედერალურ ბიუროსთან და შიდა უსაფრთხოების დეპარტამენტთან ერთად საგრძნობლად გადააკეთოს, გააფართოოს და კვლავ გახსნას ალკატრასის ციხე“, – დაწერა ტრამპმა თავის სოციალურ ქსელში.
ფლორიდიდან თეთრ სახლში დაბრუნებულმა ტრამპმა ჟურნალისტებს განუცხადა, რომ ციხის გახსნა მისი იდეა იყო. „ის კანონისა და წესრიგის სიმბოლოა“, – აღნიშნა მან.
ალკატრასი აშშ-ის ყველაზე უსაფრთხო ციხე იყო. ის კუნძულზე მდებარეობს, რომლის გარშემო წყალი საკმაოდ ცივია, ხოლო დინება – სწრაფი. ალკატრასიდან პატიმრების გაქცევის არცერთი წარმატებული შემთხვევა არ დაფიქსირებულა. ოფიციალურად ხუთი მსჯავრდებული უგზო-უკვლოდ დაკარგულად ითვლება. სავარაუდოდ, ისინი წყალში დაიხრჩნენ.