ინდოეთში აცხადებენ, რომ პაკისტანს ჯარი წინა ხაზის პოზიციებზე გადაჰყავს ინდოეთთან საზღვარზე შეტევითი ოპერაციისა და ვითარების ესკალაციისთვის. ამის შესახებ ჟურნალისტებისთვის გამართულ ბრიფინგზე ინდოეთის საჰაერო ძალების წარმომადგენელმა, პოლკოვნიკმა ვიომიკა სინგჰმა განაცხადა.
მისივე თქმით, პაკისტანის მხრიდან განხორციელებული ყველა მტრული ქმედება ეფექტურად იქნა აღკვეთილი.
„ჩვენ ვამჩნევთ, რომ პაკისტანის სამხედროებს ჯარი წინა ხაზის ტერიტორიებზე გადაჰყავთ, რაც მიუთითებს შეტევით განზრახვაზე ვითარების შემდგომი ესკალაციისთვის. ინდოეთის შეიარაღებული ძალები რჩებიან ოპერატიული მზადყოფნის მდგომარეობაში. ყველა მტრული ქმედება ეფექტურად აღვკვეთეთ და სათანადო პასუხი გავეცით. ინდოეთის შეიარაღებული ძალები კიდევ ერთხელ ადასტურებენ ესკალაციის თავიდან აცილების მიმართ ერთგულებას, იმ პირობით, რომ პაკისტანის სამხედროები შემხვედრ ნაბიჯებს გადადგამენ“, – განაცხადა სინგჰმა.
ცნობისთვის, 10 მაისს ღამით ინდოეთმა რამდენიმე სარაკეტო დარტყმა მიიტანა პაკისტანის ავიაბაზებზე. პაკისტანის შეიარაღებული ძალების წარმომადგენელმა თავდასხმა სახიფათო მოვლენად დაახასიათა, რომელიც რეგიონს დესტაბილიზაციას უქმნის. მეზობელი სახელმწიფოს აგრესიაზე საპასუხოდ, პაკისტანის მთავრობამ ინდოეთის წინააღმდეგ ფართომასშტაბიანი სამხედრო ოპერაციის დაწყების შესახებ განაცხადა.