“გუშინდელ განცხადებაშიც იკვეთებოდა რომ ჯერ აფასებს საშინაო პოლიტიკურ ვითარებას როგორც მწვავე პოლიტიკურ კრიზისს და მერე უცებ ამატებს რომ არ ერევა საშინაო საქმეებში”

რეგიონული პოლიტიკისა და თვითმმართველობის კომიტეტის თავმჯდომარემ, საპარლამენტო უმრავლესობის წევრი ირაკლი ქადაგიშვილი აფასებს საქართველოში ევროკავშირის ელჩის პაველ ჰერჩინსკის გუშინდელ განცხადებას იმის თაობაზე, რომ ის საქართველოს შიდა პოლიტიკურ საკითხებზე კომენტარს არ გააკეთებდა.

„მთელი საარჩევნო პერიოდი, არჩევნების შემდგომი პერიოდი, დაკავებულები იყვნენ პირდაპირი ჩარევით საქართველოს საშინაო პოლიტიკაში, დემოკრატიულ ანუ საარჩევნო პროცესში. გუშინდელ განცხადებაშიც იკვეთებოდა, რომ ჯერ აფასებს საშინაო პოლიტიკურ ვითარებას როგორც მწვავე პოლიტიკურ კრიზისს და მერე უცებ ამატებს, რომ არ ერევა საშინაო საქმეებში. ანუ ერთის მხრივ მიგვანიშნებს, რომ კრიზისი გვაქვს და ამაში გარკვეულად დიდი როლი სწორედ ამ გარე ჩარევას ეკუთვნის, და მეორე მხრივ ამბობს, ჩვენ აქ არაფერ შუაში არ ვართო. სამწუხაროდ, არიან შუაში და ხშირს შემთხვევაში ამ კრიზისის შექმნაში აქვთ პირდაპირი მონაწილეობა მიღებული“, – განაცხადა ირაკლი ქადაგიშვილმა.

ევროკავშირის ელჩმა, პაველ ჰერჩინსკიმ გუშინ განაცხადა, რომ საქართველოს შიდა პოლიტიკურ საკითხებზე კომენტარს არ გააკეთებდა. არქივი, კი ინახავს დიპლომატის არაერთ პოლიტიკურ განცხადებებს თუ მოწოდებებს.