დროა, ვლადიმერ პუტინი სერიოზულად მიუდგეს მშვიდობას ევროპაში, ცეცხლის შეწყვეტასა და მოლაპარაკებებს, – ამის შესახებ გაერთიანებული სამეფოს საგარეო საქმეთა მდივანმა, დევიდ ლემიმ ლონდონში ევროპელ კოლეგებთან შეხვედრის დაწყების წინ განაცხადა.
ბრიტანელი მინისტრის თქმით, დღეს არსებული გამოწვევები არა მხოლოდ უკრაინის მომავალს ეხება, არამედ ეგზისტენციალურია მთელი ევროპისთვის.
„დროა, ვლადიმერ პუტინი სერიოზულად მიუდგეს მშვიდობას ევროპაში, სერიოზულად მიუდგეს ცეცხლის შეწყვეტასა და მოლაპარაკებებს. ჩვენ ევროპაში, რა თქმა უნდა, მოვემზადებით მშვიდობისთვის და ეს იქნება ჩვენი დღევანდელი მოლაპარაკებების არსებითი ნაწილი, თუმცა ამასთან, ჩვენ ასევე უნდა ვიყოთ მზად იმ შემთხვევისთვის, თუკი ეს პუტინის მხრიდან სერიოზულობის მომენტი არ იქნება და ჩვენ ვერ მივიღებთ მშვიდობას“, – განაცხადა დევიდ ლემიმ.
ლონდონში მიმდინარე შეხვედრაში, ბრიტანეთის საგარეო საქმეთა მინისტრთან ერთად, მონაწილეობენ საფრანგეთის, იტალიის, გერმანიის, ესპანეთისა და პოლონეთის საგარეო საქმეთა მინისტრები, ასევე ევროკავშირის უმაღლესი წარმომადგენელი.