საფრანგეთის პრეზიდენტმა, ემანუელ მაკრონმა განაცხადა, რომ აშშ-ის პრეზიდენტი, დონალდ ტრამპი უახლოეს საათებსა ან დღეებში რუსულ მხარეს დაურეკავს და სტამბოლში გუშინ გამართულ რუსეთ-უკრაინის სამშვიდობო მოლაპარაკებებზე გაესაუბრება.
როგორც მაკრონმა აღნიშნა, ტირანაში ევროპის პოლიტიკური გაერთიანების სამიტზე მან, გერმანიის კანცლერმა, ფრიდრიხ მერცმა, დიდი ბრიტანეთის პრემიერ-მინისტრმა, კირ სტარმერმა და პოლონეთის მთავრობის თავმჯდომარემ, დონალდ ტუსკმა უკრაინის პრეზიდენტთან, ვოლოდიმირ ზელენსკისთან ისაუბრეს. საუბრის შემდეგ ლიდერებმა ტრამპს დაურეკეს.
„ეს არის პრეზიდენტ ტრამპის პასუხისმგებლობა, მან უნდა დაადასტუროს ეს. ის უახლოეს საათებსა ან დღეებში რუსულ მხარესთან აზრებს გაცვლის, რათა დაადგინოს, რა მოხდა და მომავალში რა ნაბიჯებია გადასადგმელი“, – აღნიშნა მაკრონმა.
საფრანგეთის ლიდერმა კიდევ ერთხელ აღნიშნა, რომ ცეცხლის შეწყვეტაზე რუსეთის უარის შემთხვევაში ევროპამ და აშშ-მა მოსკოვის წინააღმდეგ სანქციები უნდა გააძლიერონ.