მიკვირს, რატომ არიან გაკვირვებული დიდი ბრიტანეთის საელჩოში, როცა ხდება ისეთი ხალხის დაფინანსება, რომლებმაც საპარლამენტო არჩევნების მეორე დღეს მანდატები დაყარეს და პარლამენტში შემოსვლაზე უარი თქვეს, – ამის შესახებ პარლამენტის ევროინტეგრაციის კომიტეტის თავმჯდომარემ, ლევან მახაშვილმა განაცხადა.
მახაშვილის თქმით, ბრიტანეთის ელჩს ან წარმოდგენა არ აქვს, ვისზე გასცემენ დაფინანსებას, ხოლო თუ იციან, ვისზე გასცემენ გრანტს, მაშინ ეს არის შეგნებულად რადიკალიზმის და პროპაგანდის დაფინანსება.
„თანხების გაცემა ხდება პარტიულ ტელევიზიებზე, ჯიბის ტელევიზიებზე. ასევე, „ნაციონალური მოძრაობის“ სიის წევრებზე, იმ ადამიანებზე, რომლებმაც საპარლამენტო არჩევნების მეორე დღეს მანდატები დაყარეს და პარლამენტში შემოსვლაზე უარი თქვეს. როცა ასეთი ხალხის დაფინანსება ხდება, მიკვირს, რატომ არიან გაკვირვებული დიდი ბრიტანეთის საელჩოში? ორი ვარიანტია, ან ბრიტანეთის ელჩს წარმოდგენა არ აქვს, ვისზე გასცემენ დაფინანსებას და თუ წარმოდგენა არ აქვთ, შეგვიძლია, მივაწოდოთ ინფორმაცია, ვინ დგას ამ ორგანიზაციების უკან და თუ წარმოდგენა აქვთ და იციან, გრანტს ვისზე გასცემს, მაშინ ეს არის შეგნებულად რადიკალიზმის და პროპაგანდის დაფინანსება. თავად თქვან, ერთია თუ – მეორე“, – განაცხადა ლევან მახაშვილმა.
საქართველოში ბრიტანეთის საელჩომ განაცხადა, რომ არსებული გაურკვევლობის გამო უწევთ, გააუქმონ ადგილობრივ არჩევნებთან დაკავშირებული საგრანტო წინადადებები: „ამ დრომდე არ არსებობს „გრანტების დამტკიცების პროცედურის შესახებ“ გადაწყვეტილებების მიღების მექანიზმები ან ვადები. სამწუხაროდ, ამ გაურკვევლობის გამო გვიწევს, გავაუქმოთ დაგეგმილი საგრანტო წინადადებები, რომლებიც მიზნად ისახავდა დაგეგმილი მუნიციპალური არჩევნების გამჭვირვალობისა და კონკურენტუნარიანობის მხარდაჭერას“.