პრემიერ-მინისტრი თბილისის ინფრასტრუქტურის განვითარების პოლიტიკის შესახებ დედაქალაქის მერის ანგარიშს მთავრობის წევრებთან ერთად დაესწრო

დედაქალაქის ინფრასტრუქტურული განვითარების შედეგები შთამბეჭდავია, – ამის შესახებ საქართველოს პრემიერ-მინისტრმა ირაკლი კობახიძემ ინფრასტრუქტურის განვითარების პოლიტიკის შესახებ თბილისის მერის ანგარიშის მოსმენის შემდეგ განაცხადა.
მთავრობის მეთაურმა აღნიშნა, რომ დღეს თბილისი არის ერთ-ერთი ყველაზე გამწვანებული ევროპული დედაქალაქი და ეს განვითარება უნდა გაგრძელდეს.
„ყველა მიმართულებით – იქნება ეს გზების მშენებლობა-რეაბილიტაცია, წყალმომარაგების სისტემების გაუმჯობესება, ავარიული შენობების რეაბილიტაცია, ძველი თბილისის უბნების განახლება-რეაბილიტაცია, დასუფთავება, გამწვანება, არის შთამბეჭდავი შედეგები. დაახლოებით 10-12 წლის წინ, როდესაც კახი კალაძე ჯერ კიდევ არ იყო დედაქალაქის მერი, თბილისი ბოლოდან მეორე ადგილზე იყო ევროპულ დედაქალაქებს შორის გამწვანების თვალსაზრისით. დღეს ის არის ერთ-ერთი ყველაზე გამწვანებული ევროპული დედაქალაქი, რაც, რა თქმა უნდა, კახი კალაძის და მთლიანად მერიის გუნდის დამსახურებაა. ეს განვითარება უნდა გაგრძელდეს შემდეგი ოთხი წლის განმავლობაში. დარწმუნებული ვარ, 4 წლის თავზე ჩვენი დედაქალაქი იქნება კიდევ უფრო მეტად განვითარებული, კიდევ უფრო გამწვანებული და მისი ინფრასტრუქტურა იქნება კიდევ უფრო მეტად დახვეწილი“, – აღნიშნა ირაკლი კობახიძემ.
თბილისის ინფრასტრუქტურის განვითარების პოლიტიკის შესახებ დედაქალაქის მერის ანგარიშს პრემიერ-მინისტრი მთავრობის წევრებთან ერთად დაესწრო. ღონისძიებაზე კახა კალაძემ ბოლო წლების განმავლობაში დედაქალაქში განხორციელებულ მასშტაბურ სამუშაოებსა და ძირითად ინფრასტრუქტურულ პროექტებზე ისაუბრა. როგორც თბილისის მერმა აღნიშნა, დედაქალაქში, არაერთი გამზირისა და ქუჩის რეაბილიტაციასთან ერთად, სრულად შეიცვალა მიწისქვეშა კომუნიკაციები, დაირგო მწვანე ნარგავები, მოეწყო ახალი განათებები, გამაგრდა ავარიული კორპუსები, აღდგა ისტორიული შენობები და მუზეუმები, რისთვისაც ჯამში 1 815 000 000 ლარი დაიხარჯა.