კამპანია „საქართველო შავი ხვრელია“ რამდენიმე თვე გაგრძელდა, რომელმაც ვერ ვიტყვით, რომ ზიანი არ მიაყენა ჩვენს სახელმწიფოს, ზუსტად იმ პერიოდში, როდესაც კანდიდატის სტატუსს ველოდით და მართლაც კარდაკარ დავდიოდით, რომ ჩვენი პარტნიორები დაგვერწმუნებინა იმაში, რომ არასწორი იქნებოდა საქართველოს ჩამოტოვება ამ სამეულიდან და არასწორი გზავნილი იქნებოდა გარე სამყაროსთვის გეოპოლიტიკურად ასეთი გადაწყვეტილების მიღება, – ამის შესახებ საქართველოს საგარეო საქმეთა მინისტრმა, მაკა ბოჭორიშვილმა, პარლამენტის დროებითი საგამოძიებო კომისიის სხდომაზე განაცხადა.
მისი თქმით, საქართველოსთვის კანდიდატის სტატუსის არმიცემა რომ იმ შედეგს არ გამოიღებდა რაც ევროპელებს სურდათ, იქვე უხსნიდა თავის კოლეგებს, თუმცა, საქართველოს ხელისუფლების შეცვლის სურვილი და მიზანი იმდენად დიდი იყო, რომ ქვეყანას ამ მიზნით არ მიანიჭეს კანდიდატის სტატუსი.
„ამ გეოპოლიტიკურ მიზნებს სხვა მიზნებმა აჯობა და ნამდვილად მოხდა ისე, რომ საქართველოს არ მისცეს კანდიდატის სტატუსი. თუმცა, მაშინვე ვუხსნიდი ჩემს კოლეგებს იქ, რომ ამას არ ექნებოდა ის ეფექტი, რისთვისაც სურდათ, რომ გამოეყენებინათ, ამით ვერ მიიღებდნენ იმ შედეგს, რა შედეგის მიღებაც სურდათ და გამოჩნდებოდა ევროპის მხრიდან კიდევ ერთხელ დაშვებული გეოპოლიტიკური შეცდომა, თუმცა, რა თქმა უნდა, ეს აზრი მაშინ არ იყო გათვალისწინებული, იმდენად დიადად ჩანდა საქართველოს ხელისუფლების შეცვლის მიზანი და სურვილი, რომ მათ ეს ამისთვის გააკეთეს.“ – განაცხადა მაკა ბოჭორიშვილმა.