ნატოს წევრი ქვეყნები შეთანხმდნენ, რომ 2035 წლისთვის თავდაცვის ხარჯებს მთლიანი შიდა პროდუქტის 5%-მდე გაზრდიან, – აღნიშნულია ალიანსის ჰააგის სამიტის შედეგად მიღებულ ერთობლივ კომუნიკეში.
„უსაფრთხოების ფუნდამენტური საფრთხეებისა და გამოწვევების პირისპირ ყოფნისას, კერძოდ რუსეთისგან მომდინარე ევროატლანტიკური უსაფრთხოების გრძელვადიანი საფრთხისა და ტერორიზმის მუდმივი საფრთხის გათვალისწინებით, ნატოს მოკავშირეები იღებენ ვალდებულებას 2035 წლისთვის მშპ-ის 5% თავდაცვის საჭიროებებზე დახარჯონ“, – აღნიშნულია დოკუმენტში.
როგორც დეკლარაციაშია ნათქვამი, ნატოს წევრი ქვეყნები ყოველ წელს თავდაცვის ხარჯების გაზრდის გეგმას წარადგენენ. ამასთან ერთად, მშპ-ის 5%-ის 3,5% ნატოს წევრი ქვეყნების მიერ ძირითადი თავდაცვითი ხარჯების დასაფარად დაიხარჯება, ხოლო დანარჩენი 1,5% – კრიტიკული ინფრასტრუქტურის დაცვას მოხმარდება.