პარლამენტის პლენარულ სხდომაზე, საქართველოს 2024 წლის სახელმწიფო ბიუჯეტის შესრულების შესახებ ანგარიში მოისმინეს.
ანგარიში კანონმდებლებს ფინანსთა მინისტრის პირველმა მოადგილემ გიორგი კაკაურიძემ გააცნო.
მომხსენებელმა გასული წლის ბიუჯეტის შესრულების პარამეტრებსა და ეკონომიკური ზრდის მაჩვენებლებზე ისაუბრა.
„გასულ წელს ჩვენ ბიუჯეტი დავგეგმეთ 5.2%-ის რეალური ეკონომიკური ზრდის პროგნოზზე. თუმცა, წლის განმავლობაში უფრო მაღალი ეკონომიკური ზრდის ტენდენციები გვქონდა და ეკონომიკური ზრდის საბოლოო პროგნოზი 9% იყო, საბოლოო ჯამში კი რეალურმა ეკონომიკურმა ზრდამ 9.4% შეადგინა“, – განაცხადა გიორგი კაკაურიძემ.
მისივე თქმით, ბოლო ორი წლის განმავლობაში ინფლაცია მიზნობრივ მაჩვენებელზე გაცილებით დაბალია.
მომხსენებლის ინფორმაციით, ერთ-ერთი მიმართულება, რომელმაც მაღალი ეკონომიკური ზრდა განაპირობა საგარეო სექტორი იყო. როგორც გიორგი კაკაურიძემ აღნიშნა, გასულ წელს საგარეო ვაჭრობამ 23 მილიარდ 485 მილიონ დოლარამდე შეადგინა. აქედან, ექსპორტის მაჩვენებელი 6 მილიარდ 560 მილიონი დოლარი, ხოლო იმპორტის მაჩვენებელი – 16 მილიარდ 924 მილიონი დოლარი იყო.
ტურიზმიდან გასულ წელს მიღებული შემოსავალი 4 მილიარდ 425 მილიონი დოლარია, რაც 2023 წლის მაჩვენებელთან შედარებით 7.3%-ით მეტია.
მინისტრის პირველმა მოადგილემ სამინისტროების მიერ ბიუჯეტის ათვისებისა და შესრულების ნაწილზეც ისაუბრა.
„სამინისტროების ფარგლებში დაგეგმილი პროგრამები სრულად შესრულდა. ამავდროულად, ჩვენ გვქონდა დეფიციტისა და ვალის უფრო დაბალი მაჩვენებელი, რაც, რა თქმა უნდა, დადებითად შეიძლება შეფასდეს“, – განაცხადა გიორგი კაკაურიძემ.
2024 წლის ნაერთი ბიუჯეტის შემოსავლების საპროგნოზო მაჩვენებელი განისაზღვრა 25 616 000.0 ათასი ლარით, საანგარიშო პერიოდში მობილიზებულ იქნა 25 722 782.0 ათასი ლარი, ანუ საპროგნოზო მაჩვენებლის 100.4%. გადასახადების საპროგნოზო მაჩვენებელი განისაზღვრა 23 260 000.0 ათასი ლარით, საანგარიშო პერიოდში მობილიზებულ იქნა 23 290 004.8 ათასი ლარი, ანუ საპროგნოზო მაჩვენებლის 100.1%.
2024 წლის სახელმწიფო ბიუჯეტის შესრულების შესახებ ანგარიშს პარლამენტის პლენარულ სხდომაზე, 85 ხმით მხარი დაუჭირეს.