უკრაინა გეგმავს სანქციები დაუწესოს იმ ქვეყნებს, რომლებიც რუსულ ნავთობს ყველაზე დიდი მოცულობით ყიდულობენ, – განაცხადა უკრაინის საგარეო საქმეთა მინისტრმა, ანდრეი სიბიგამ.
„ჩვენ აგრეთვე მოვუწოდებთ ჩვენს პარტნიორებს ამ ნაბიჯისკენ. რუსულ ნავთობს ყველაზე დიდი მოცულობით არცთუ ისე ბევრი ქვეყანა მოიხმარს. ისინი ამასთან ერთად ე.წ. ჩრდილოვან ფლოტს იყენებენ“, – თქვა სიბიგამ.
უკრაინის პირველი დიპლომატის თქმით, უახლოეს მომავალში კიევი ასეთ ქვეყნებთან მიმართებაში სასანქციო ნაბიჯებს გადადგამს.
როგორც სიბიგამ აღნიშნა, ნავთობს, გაზს და სხვა ენერგეტიკულ პროდუქტებს დღემდე მოაქვს რუსეთისთვის დიდი შემოსავალი და ევროპულ ბაზრებზეც კი იყიდება.
ცნობისთვის, რუსული ნავთობის უმსხვილესი იმპორტიორები ჩინეთი, ინდოეთი და თურქეთი არიან. გარდა ამისა, რუსული ნავთობი ევროპაშიც იყიდება.