დონალდ ტრამპმა არ გამორიცხა, რომ ირანს სამი ძირითადი ბირთვული ობიექტის გარდა, საიდუმლო ბირთვული ობიექტი კიდევ ჰქონდეს. ამის შესახებ შეერთებული შტატების პრეზიდენტმა, ტელეკომპანია Fox News-სთან ექსკლუზიურ ინტერვიუში განაცხადა.
ტრამპმა ირანისთვის სანქციების მოხსნის შესაძლებლობაზეც ისაუბრა, თუმცა მხოლოდ მას შემდეგ, რაც ირანი ისრაელის წინააღმდეგ ცეცხლს შეწყვეტს.
„ჩვენ ვიცოდით, რომ ირანს ბევრი ბირთვული ობიექტი ჰქონდა, სავარაუდოდ, სამი ძირითადი და პლუს ერთი. ნაკლებად სავარაუდოა, რომ თეირანმა ამერიკულ იერიშებამდე გამდიდრებული ურანის გადამალვა შეძლო, მით უფრო იმის გათვალისწინებით, რომ ასეთი ოპერაცია რთულთან ერთად, საშიშიცაა. ირანს ბირთვული იარაღის შექმნამდე კვირები აშორებდა. ამჟამად მათ ყველაზე ნაკლებად სურთ, ბირთვულ იარაღზე იფიქრონ.
სანქციები ირანის წინააღმდეგ ჯერ ისევ მოქმედებს, თუ ისინი სრულ სამუშაოს გასწევენ, იქნებიან მშვიდობიანი და შეძლებენ ჩვენს დარწმუნებას, რომ მათგან მეტი ზიანი აღარ წამოვა, მე სანქციებს მოვხსნი“, – განაცხადა ტრამპმა.