მთავარი ამოცანაა ჩვენთვის, რომ ჩვენი შვილები, ახალგაზრდები გადავარჩინოთ და ყველაფერი გავაკეთოთ იმისათვის, რომ ეს იყოს უკომპრომისო ბრძოლა, – განაცხადა ფრაქცია „ქართული ოცნების“ თავმჯდომარის მოადგილემ რიმა ბერაძემ. დეპუტატი გამოეხმაურა ნარკომანიასთან ბრძოლის მიმართულებით, პრემიერ-მინისტრის ორ საკანონმდებლო ინიციატივას.
„დაჩქარებული წესით პარლამენტი განიხილავს ამ ორ მეტად მნიშვნელოვან საკითხს. კარგად არის ცნობილი, რომ ჩანაცვლებით თერაპიაში სახელმწიფოს მხოლოდ 80 პროცენტი იყო ჩართული და ჩვენ გვაქვს მზაობა, რომ მთლიანად, 100 პროცენტი გააკონტროლოს სახელმწიფომ. ნარკომანია არ არის პანდემია. ეს არის დიდი ხნის წინ დაწყებული ბრძოლა. ჩვენ ქვეყანა ყოველთვის ცდილობდა, რომ ამ მეტად მძიმე სენს გამოუცხადოს ბრძოლა. მთავარი ამოცანაა ჩვენთვის, რომ ჩვენი შვილები, ახალგაზრდები გადავარჩინოთ და ყველაფერი გავაკეთოთ იმისათვის, რომ ეს იყოს უკომპრომისო ბრძოლა“, – აცხადებს ბერაძე.
მთავრობის ორი ინიციატივა, რომელიც ნარკომანიასთან ბრძოლას უკავშირდება, დღეს პარლამენტის ბიუროს წარედგინება. შესაბამის საკანონმდებლო ცვლილებებს, პარლამენტი მიმდინარე კვირაში დაჩქარებული წესით განიხილავს და მიიღებს. ცვლილებების თანახმად, ჩანაცვლებითი თერაპიის პროგრამებს კერძო სუბიექტები აღარ განახორციელებენ. სრულ პასუხისმგებლობას აიღებს სახელმწიფო, რომელიც, კონკრეტული დაწესებულებების მეშვეობით, მკურნალობის პროცესში ერთიანი სტანდარტის დამკვიდრებას უზრუნველყოფს.
პარალელურად, გამკაცრდება კონტროლი ჩანაცვლებითი თერაპიის სახელმწიფო პროგრამების განხორციელებაზე. სრულად აიკრძალება კერძო კომპანიების მიერ ფსიქოტროპული მედიკამენტების იმპორტი და რეალიზაცია მხოლოდ სახელმწიფოს პრეროგატივა იქნება.
პრემიერი ხაზგასმით ამბობს, რომ არცერთი ადამიანი, რომელიც ჩანაცვლებითი თერაპიის პროგრამით სარგებლობს, მედიკამენტის გარეშე არ დარჩება, ხელისუფლება კი უკომპრომისო იქნება ნარკოტიკული საშუალებების რეალიზატორების მიმართ.