საქართველოს კულტურის მინისტრი თინათინ რუხაძე სსიპ საქართველოს კულტურული მემკვიდრეობის დაცვის ეროვნული სააგენტოსა და მის დაქვემდებარებაში შემავალი მუზეუმებისა და მუზეუმ-ნაკრძალების თანამშრომლებს შეხვდა.
კულტურის სამინისტროში გამართულ შეხვედრას ესწრებოდნენ კულტურის მინისტრის პირველი მოადგილე მაკა გურგენიძე, მინისტრის მოადგილეები ბექა დავითულიანი და გიორგი მირცხულავა, კულტურული მემკვიდრეობის დაცვის ეროვნული სააგენტოს ხელმძღვანელი თეა ონიანი.
თინათინ რუხაძემ ისაუბრა კულტურული მემკვიდრეობის დაცვის ეროვნულ სააგენტოში, მუზეუმებში და მუზეუმ-ნაკრძალებში ჩატარებული რეორგანიზაციის ფარგლებში სააგენტოს სტრუქტურაში შესულ ცვლილებებსა და შრომის ანაზღაურების ზრდაზე. საუბარი შეეხო დარგში არსებული გამოწვევების გადაჭრის გზებს და სამომავლო გეგმებს.
კულტურის მინისტრის თქმით, სტრუქტურული ცვლილებების შედეგად შესაძლებელი გახდა კულტურული მემკვიდრეობის სააგენტოსა და მის დაქვემდებარებაში შემავალი მუზეუმებისა და მუზეუმ-ნაკრძალების თანამშრომლებისთვის შრომის ანაზღაურების გაზრდა.
„მუზეუმებსა და მუზეუმ-ნაკრძალებს აუცილებლად სჭირდება შენარჩუნება და სრულიად სხვა ხედვით განვითარება, თანამშრომლები უნდა გრძნობდნენ, რომ ქვეყნისთვის მნიშვნელოვან საქმეს აკეთებენ. მინდა მადლობა გადაგიხადოთ და გითხრათ, რომ შრომის ანაზღაურება რიგ შემთხვევაში საშუალოდ 50-60%-ით გაიზარდა, თუმცა არის საშტატო ერთეულები, რომელზედაც ბევრად დიდია მატება“, – განაცხადა კულტურის მინისტრმა.
როგორც თინათინ რუხაძემ აღნიშნა, საჭიროა მუზეუმ-ნაკრძალები იქცეს ვიზიტორთა ცენტრებად.
„ამ მიმართულებით კონცეფცია ერთად გვექნება გასაკეთებელი, თუ როგორ ვაქციოთ მუზეუმ-ნაკრძალები ვიზიტორთა ცენტრებად. მოგვაწოდეთ ახალი იდეები, ჩვენ დაგეხმარებით. ეს არის სწორი და თანამედროვე მიდგომა, ეს შეიძლება იყოს საგანმანათლებლო, ბავშვებზე, ტურისტულ სეზონებზე მიბმული. მგონია, რომ უკეთეს პირობებში უფრო მეტი მოტივაცია გექნებათ და უფრო სიყვარულით გააკეთებთ საქმეს“, – განაცხადა თინათინ რუხაძემ.