“ჩვენ ვაპირებთ რომ ის კანონები, რომლებიც მივიღეთ ბოლომდე დავიცვათ და დავიცვათ შესაბამისად საქართველოს ინტერესები”

დადასტურდა ის, რასაც ჩვენ ვსაუბრობდით, რომ ეს ხალხი პირდაპირ გთხოვს გავაუქმოთ გამჭვირვალობის კანონი, ანუ აღარ ვიცოდეთ ვინ აფინანსებს რევოლუციებს საქართველოში, – ასე გამოეხმაურა განათლების, მეცნიერებისა და ახალგაზრდულ საქმეთა კომიტეტის თავმჯდომარის პირველი მოადგილე გიორგი ჩაკვეტაძე ევროკავშირის ულტიმატუმს კანონების გაუქმებასთან დაკავშირებით.

მისი თქმით, მმართველი გუნდი გააგრძელებს მუშაობას იმისთვის, რომ საქართველოს ეროვნული ინტერესები იყოს მაქსიმალურად დაცული.

„ჩვენ ვაპირებთ, რომ ის კანონები, რომლებიც მივიღეთ და რომლებიც ემსახურება საქართველოს ეროვნულ ინტერესებს, ბოლომდე დავიცვათ და დავიცვათ შესაბამისად საქართველოს ინტერესები. აქედან გამომდინარე, თუკი ვიზალიბერალიზაციის საკითხი გადის ოჯახური ღირებულების დაცვაზე და გამჭვირვალობის კანონზე, ჩვენ არ ვაპირებთ ამ ყველაფრის გატარებას, უფრო მეტიც, ვიმუშავებთ იმაზე, რომ საქართველოს ეროვნული ინტერესები იყოს მაქსიმალურად დაცული“, – აცხადებს ჩაკვეტაძე.

ევროკომისიამ საქართველოს საგარეო საქმეთა მინისტრს, მაკა ბოჭორიშვილს წერილი გამოუგზავნა, სადაც იმ რვა რეკომენდაციის ჩამონათვალია, რომელიც ქვეყანამ უნდა შეასრულოს, რათა უვიზო რეჟიმს საფრთხე არ დაემუქროს. მათ შორის ევროკავშირი ითხოვს გაუქმდეს „ოჯახური ღირებულებებისა და არასრულწლოვანთა დაცვის შესახებ“ კანონი, უზრუნველყოფილი იყოს LGBTIQ თემის უფლებების სრული დაცვა.