აშშ-ის პრეზიდენტმა, დონალდ ტრამპმა განაცხადა, რომ ფედერალური სუბსიდიების ჩამორთმევით ილონ მასკის კომპანიებს არ გაანადგურებს.
ტრამპის თქმით, მას სურს მილიარდერი ტექნოლოგიური მეწარმის ბიზნესის აყვავება.
„ყველა აცხადებს, რომ მე ილონის კომპანიებს გავანადგურებ, რადგან წავართვი მას აშშ-ის მთავრობისგან მიღებული მასშტაბური სუბსიდიების ნაწილი, თუ არა მთლიანად. ეს ასე არ არის! მსურს, რომ ილონი და ჩვენს ქვეყანაში არსებული ყველა ბიზნესი წარმატებული იყოს“, – აღნიშნა დონალდ ტრამპმა.
მანამდე ილონ მასკმა კომპანია „ტესლას“ ინვესტორები გააფრთხილა, რომ აშშ-ის მთავრობის მიერ ელექტრომობილების მწარმოებლებისთვის მხარდაჭერის შემცირებამ, შესაძლოა, კომპანიისთვის რთული პერიოდი გამოიწვიოს.
ივნისში მომხდარი უთანხმოებიდან ერთი კვირის შემდეგ, „როიტერმა“ გაავრცელა ინფორმაცია, რომ თეთრმა სახლმა თავდაცვის დეპარტამენტს და „ნასას“ დაავალა, შეეგროვებინათ დეტალები „სფეისიქსთან“ მილიარდობით დოლარის ღირებულების კონტრაქტების შესახებ, რათა მოემზადებინათ შესაძლო ნაბიჯები ბიზნესმენისა და მისი კომპანიების წინააღმდეგ.
როგორც მედია წერს, მასკმა ტრამპის ნოემბრის საპრეზიდენტო არჩევნებში დასახმარებლად მეოთხედ მილიარდ დოლარზე მეტი დახარჯა და ხელმძღვანელობდა მთავრობის ეფექტურობის დეპარტამენტის ძალისხმევას, რომელიც მიზნად ისახავდა ბიუჯეტის შემცირებას და ფედერალური სამუშაო ძალის შემცირებას. მასკმა ადმინისტრაცია მაისის ბოლოს დატოვა. ტრამპსა და მასკს შორის ურთიერთობა მალევე დაიძაბა, როდესაც მასკმა ღიად დაგმო პრეზიდენტის მიერ გადასახადების შემცირებისა და ხარჯების შესახებ წარდგენილი კანონპროექტი.