უნგრეთის პრემიერ-მინისტრმა, ვიქტორ ორბანმა განაცხადა, რომ ის ევროკავშირში უკრაინის გაწევრიანების წინააღმდეგია.
ორბანი მიიჩნევს, რომ ომში მყოფი ქვეყანა გაერთიანების წევრი არ უნდა იყოს, რადგან ევროკავშირი იძულებული გახდება ომში ჩაებას. უნგრეთი კი ფრონტის ხაზზე მყოფ სახელმწიფოდ გადაიქცევა, რის გამოც დაიღუპებიან უნგრელები, განადგურდება უნგრეთი და ქვეყნის ეკონომიკა.
ორბანი ფიქრობს, რომ ევროკავშირმა უკრაინას, წევრობის ნაცვლად, სტრუქტურული და სტრატეგიული პარტნიორობა უნდა გაუწიოს.
„ერთი წლის წინ უკრაინაში ომის დასასრულებლად უკეთესი ვითარება იყო. ახლა საქმე უფრო რთულადაა. ის, რომ უკრაინა ამ ომს მოიგებდა და დრო მათ მხარეს იყო, ერთი წლის წინაც და ახლაც სიცრუეა. უკრაინა ჩვენი მეზობელია, მაგრამ მისი ევროკავშირში გაწევრიანება ჩვენთვის მიუღებელია. რადგან უკრაინაში ომია, ის ჩვენს მიწაზეც მოვა და ბრძოლის ველად გადავიქცევით. ომში მყოფი ქვეყნის ევროპაში გაწევრიანება ევროპაში ომს ნიშნავს. ეს რეგიონს დააზიანებს, მოიტანს ნგრევასა და ტანჯვას. ეს გაანადგურებს უნგრეთს, უამრავი უნგრელი დაიღუპება, ახალგაზრდებს ომში წაიყვანენ. საშინელი განადგურება გველის. დაინგრევა ეკონომიკა“, – თქვა ორბანმა.