გაერთიანებული სამეფო, საფრანგეთი და გერმანია ისრაელს ღაზაში ომის დასრულებისკენ მოუწოდებენ. ერთობლივ განცხადებაში ისინი მხარეებს მოუწოდებენ, დაასრულონ კონფლიქტი ცეცხლის დაუყოვნებლივ შეწყვეტით და უპირობოდ გათავისუფლდეს ყველა მძევალი.
„უნდა დასრულდეს ჰუმანიტარული კატასტროფა ღაზაში, რომლის მოწმეც ვართ. დადგა დრო, ღაზაში ომი დასრულდეს“, – ნათქვამია განცხადებაში.
განცხადებაშია ასევე აღნიშნულია, რომ დაუყოვნებლივ უნდა იქნეს დაკმაყოფილებული მშვიდობიანი მოსახლეობისთვის ყველაზე საბაზისო საჭიროებები, მათ შორის წყალსა და საკვებთან წვდომა.
ქვეყნები ასევე მოუწოდებენ ისრაელს, სასწრაფოდ დართოს ნება გაერო-სა და ჰუმანიტარულ არასამთავრობო ორგანიზაციებს, განახორციელონ თავიანთი სამუშაო, რათა აღმოფხვრან შიმშილი.
„ისრაელმა უნდა დაიცვას საერთაშორისო სამართლით აღებული ვალდებულება. „ჰამასის“ განიარაღება სავალდებულო პირობას წარმოადგენს და „ჰამასმა“ ღაზის მომავალში არავითარი როლი აღარ უნდა შეასრულოს. პალესტინელთა მიმართებაში ანექსიის, განსახლებებისა და მოსახლეთა ძალადობის აქტები ძირს უთხრის ორი სახელმწიფოს შეთანხმებულ პერსპექტივებს“, – აღნიშნულია განცხადებაში.