ოპოზიციაში თითქმის ყველა ჩართულია გარედან მართულ პროცესებში. როდესაც ვამბობ, რომ, სამწუხაროდ, არ გვყავს ღირსეული ოპოზიცია, ამას ვგულისხმობ. რა ნამუსით საუბრობენ სამშობლოზე, როცა უბრძოლველად ჩააბარეს კოდორის ხეობა, ამდენი ადამიანი გახადეს დევნილი? – ამის შესახებ საქართველოს პრეზიდენტმა, მიხეილ ყაველაშვილმა განაცხადა.
ყაველაშვილი თქმით, 2008 წლის ომის შემდეგ საქართველოს მაშინდელმა ხელისუფლებამ რუსეთთან რიტორიკა შეცვალა, რადგან გარედან ასეთი დავალება ჰქონდათ მიღებული.
„ერთი სცენარია, ერთი ქსელია, რომელიც გარედან არის დაფინანსებული. ჩვენდა სამწუხაროდ, ამაში ჩართულია მთელი ოპოზიცია. ტულსი გაბარდი საუბრობს ამავე თემაზე, წარმოგიდგენიათ, როგორი თანხვედრაა? მინდა, ახალგაზრდებს მივმართო, როცა ჩვენ წინა ხელისუფლების დანაშაულებრივ ქმედებებზე ვსაუბრობდით, მაშინ ქილიკი დაიწყეს, რომ არ ახსოვთ ეს თემები. ახლა მინდა, პასუხი გავცე ბატონ ჯაფარიძეს, რომელიც 2012 წლის შემდეგ გახდა „ნაციონალური მოძრაობის“ პარტიის წევრი. თვითონ აღიარა, რომ დანაშაულს ჩადიოდნენ პენიტენციურ დაწესებულებაში, პატიმრებს აწამებდნენ და ამის შესახებ მთავრობაში იცოდნენ, მას აქვს ნათქვამი, რომ მან გააჟღერა ეს პირველად. ამის შემდეგ ეს ადამიანი ხდება იმ დანაშაულებრივი პარტიის წევრი. 2008 წელს გვქონდა ომი რუსეთის ფედერაციასთან, მაშინ აწამეს და მოკლეს გიორგი ანწუხელიძე. სწორედ ერთ წელიწადში სტრატეგიული ობიექტები მტერს მიჰყიდეს, ეს ლიდერები, რომლებიც დღეს რუსთაველზე არიან – ბურჭულაძე, ქათამაძე და სხვები, პირდაპირ უმღეროდნენ პუტინს იმ წლებში. ლარსზე იდგა მაშინდელი პრეზიდენტი და თავად ხვდებოდა რუს ტურისტებს“, – განაცხადა ყაველაშვილმა.
პრეზიდენტის განცხადებით, სწორედ 2008 წლის შემდეგ, მალევე მიიღო საქართევლოს მაშინდელმა ხელისუფლებამ რუსი ტურისტები და მტერს გადასცა სტრატეგიული ობიექტები.
„მაშინ ყველა ერთ ხმაში ლაპარაკობდა, რომ უნდა მიეღოთ რუსი ტურისტები, ეს დამოკიდებულება ჰქონდათ ჩვენი ომის შემდეგ. რა შეიცვალა 15 წლის შემდეგ, უკრაინაში შეჭრის შემდეგ გახდა გმირი ანწუხელიძე მათთვის? ახლა გახდა რუსეთი მტერი? პასუხი გამცენ, მაშინ რატომ აკეთედნენ ამას? მე გავცემ პასუხს, დღეს რომ ქილიკობენ „დიფ სთეითზე“, მაშინ გადატვირთვა მოხდა რუსეთსა და „დიფ სთეითს“ შორის, ამის შემდეგ რუსეთი გახდა ამათი პარტნიორი, რადგან დაავალეს, რომ პოლიტიკა უნდა ყოფილიყო შეცვლილი. ახლა, როგორც კი შეიცვალა დამოკიდებულება რუსეთის მიმართ, ისევ დაუქნიეს ალამი და ახლა გაახსენდათ, რომ რუსეთი მტერია, ახლა გაახსენდათ ანწუხელიძე, ახლა გახდა რუსი ტურისტი მტერი და ა.შ. ეს ფაქტებია. მეცოდებიან ეს ახალგაზრდები, რომ გარე დაფინანსებით არიან ამ ყველაფერის მონაწილე. რომ ჰგონიათ, გულწრფელები არიან და სამშობლოსთვის იბრძვნიან, დაუსვან ეს კითხვები მათ. გაციებული არ იყო ჩვენი გმირების სხეულები, რომ აქ ყიჟინა მოაწყვეს, გამარჯვებას ზეიმობდნენ. ეს იცის საქართველოს საზოგადოებამ. როცა ვამბობ, რომ, სამწუხაროდ, არ გვყავს ღირსეული ოპოზიცია, ამას ვგულისხმობ. თითქმის ყველა ჩართულია გარედან მართულ პროცესებში. რა ნამუსით საუბრობენ სამშობლოზე? უბრძოლველად ჩააბარეს კოდორის ხეობა, ამდენი ადამიანი გახადეს დევნილი“, – განაცხადა ყაველაშვილმა.