ბელარუსის დედაქალაქ მინსკის საჰაერო სივრცეში უცნობი უპილოტო აპარატი ჩამოაგდეს. ინფორმაციას ამის შესახებ ადგილობრივი მედია ავრცელებს.
ბელარუსის მედია ქვეყნის თავდაცვის სამინისტროზე დაყრდნობით წერს, რომ საჰაერო თავდაცვის ძალებმა უცნობი აპარატის ფრენა შეაჩერეს.
გავრცელებული ცნობით მინსკში აპარატის ჩამოვარდნის შედეგად არავინ დაშავებულა.
ბელარუსის საჰაერო ძალებმა უპილოტო აპარატი დაახლოებით ღამის 02:00 საათზე აღმოაჩინეს. ელექტრონული ბრძოლის საშუალებების ზემოქმედების შედეგად, ღამის 02:33 საათზე, უპილოტო საფრენი აპარატი მინსკში, მატუსევიჩის ქუჩაზე, 72-ე სახლთან ახლოს ჩამოვარდა.
ბელარუსის თავდაცვის სამინისტრომ ასევე აღნიშნა, რომ ამ ინციდენტის გათვალისწინებით, დაუყოვნებლივ მიიღება დამატებითი ზომები საჰაერო სივრცის გამოყენების კონტროლის გასაძლიერებლად.
მედიის ცნობით, ინციდენტთან დაკავშირებით გამოძიება მიმდინარეობს. გავრცელებული ცნობებით, ბელარუსის პრეზიდენტი ალექსანდრ ლუკაშენკო სიტუაციას პირადად აკონტროლებს.