საარბიტრაჟო გადაწყვეტილება მორიგ ჯერზე არის დასტური იმისა, რასაც ვამბობდით წლების განმავლობაში, რომ, სამწუხაროდ, ანაკლიის პროექტთან დაკავშირებით ხაზარაძემ ისეთი გეგმა შესთავაზა სახელმწიფოს, ნებისმიერ შემთხვევაში, წაგება იქნებოდა თუ მოგება, მას ფული უნდა ჩაედო ჯიბეში, თუ ანაკლიის პორტიდან იქნებოდა წაგება, სახელმწიფოდან უნდა ჩაედო ჯიბეში ფული, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.
მისი თქმით, სახელმწიფომ მას არაერთხელ გადაუვადა პროექტის განხორციელების ვადები.
„თავად ხაზარაძემ რამდენჯერმე აღიარა, რომ მას ჰქონდა მოლაპარაკება ჩინელებთან, ირანელებთან, ამერიკელებთან, მაგრამ ვერ მოზიდა ვერცერთი პარტნიორი, რაც თავისთავად იყო მისი ბრალეულობა. შემდგომ იკადრა, რომ თავის სახელმწიფოს და ხალხს მოსთხოვა მილიარდ-ნახევარი, საქართველოს მოქალაქეებს უნდა ამოეღოთ ჯიბიდან ეს მილიარდ-ნახევარი და წასულიყო ხაზარაძის ჯიბეში, რადგან მან ეს პროექტი უბრალოდ ვერ განახორციელა. ეს არის მისი მიდგომა ქართული სახელმწიფოს მიმართ და ეს საარბიტრაჟო გადაწყვეტილება ამაზე მეტყველებს ზუსტად, რომ შეიტანა მოგებისთვის. არბიტრაჟმა უთხრა, რომ არამცთუ შენ არ გეკუთვნის, არამედ აქეთ გაქვს გადასახდელი ბიუჯეტისთვისაც და იმ ადამიანებისთვისაც, ვინც გადააგდე. ეს არის რეალობა“, – განაცხადა მაჭარაშვილმა.
საქართველოს იუსტიციის სამინისტროს ინფორმაციით, მამუკა ხაზარაძემ და ბადრი ჯაფარიძემ ანაკლიის პორტის საქმეზე დავა ვაშინგტონის არბიტრაჟშიც წააგეს. მათივე ცნობით, აღნიშნული დავის ფარგლებში ხაზარაძისა და ჯაფარიძის ჰოლანდიელი პარტნიორი ბობ მეიერი ითხოვდა 64 მილიონი აშშ დოლარის გადახდას, თუმცა არბიტრაჟმა მისი ყველა მოთხოვნა უარყო და მას თავად დააკისრა საქართველოს მთავრობის სასარგებლოდ 6,5 მილიონი აშშ დოლარის გადახდის ვალდებულება.