სერბეთში კიდევ 11 ადამიანი დააკავეს გამოძიების ფარგლებში, რომელიც 2024 წლის ნოემბერში ნოვი სადის სარკინიგზო სადგურის სახურავის ჩამონგრევას უკავშირდება. ამ შემთხვევას მაშინ 16 ადამიანის სიცოცხლე ემსხვერპლა.
დაკავებულთა შორის არიან ქვეყნის მშენებლობის, ტრანსპორტისა და ინფრასტრუქტურის ყოფილი მინისტრი ტომისლავ მომიროვიჩი და სახელმწიფო რკინიგზის კომპანიის ყოფილი აღმასრულებელი დირექტორი ნებოიშა შურლანი. მედიის ცნობით, ასევე დაგეგმილი იყო მშენებლობის კიდევ ერთი ყოფილი მინისტრის, გორან ვესიჩის დაკავება, თუმცა ის 31 ივლისს ჰოსპიტალში გადაიყვანეს. სერბული საავენტიების ინფორმაციით, ვესიჩს პირველ აგვისტოს სასწრაფო ოპერაცია ჩაუტარდა.
დაკავებები განხორციელდა სისხლის სამართლის გამოძიების ფარგლებში, რომელიც 2024 წლის თებერვალში ნოვი სადის პროკურატურამ კორუფციული გარიგების ეჭვის საფუძველზე დაიწყო.
გამოძიების მიხედვით, ორმა ყოფილმა მინისტრმა და კიდევ რამდენიმე პირმა საშუალება მისცეს ჩინური კომპანიების კონსორციუმს, China Railway International-სა დაChina Communications Construction (CRI-CCC)-ს, რომლებმაც ნოვი სადის სადგურის რეკონსტრუქცია განახორციელეს, ბიუჯეტიდან თანხები უკანონოდ მიეღოთ, რის შედეგადაც სერბეთის სახელმწიფო ბიუჯეტს 115,6 მილიონი დოლარის ზარალი მიადგა, ხოლო ჩინურმა კომპანიებმა 18 მილიონ დოლარზე მეტი უკანონო მოგება მიიღეს.
ნოვი სადის ტრაგედიამ სერბეთში მასობრივი პროტესტი და მთავრობის გადადგომა გამოიწვია. ნოვი სადში ახალგარემონტებული სარკინიგზო სადგურის გარე ბეტონის სახურავი 2024 წლის პირველ ნოემბერს ჩამოინგრა. შედეგად, დაიღუპა 16 ადამიანი. მომხდარის გამო მშენებლობის მაშინდელმა მინისტრმა, გორან ვესიჩმა თანამდებობა დატოვა. ამის მიუხედავად, ქვეყანაში მასშტაბური საპროტესტო ტალღა აგორდა. დემონსტრანტები ტრაგედიის მიზეზად ასახელებდნენ კორუფციას, უყურადღებობას, უსაფრთხოების წესების უგულებელყოფას და კორუფციულ კავშირებს სერბეთის მმართველ ელიტაში. იანვარში აქციების ფონზე თანამდებობა დატოვა სერბეთის პრემიერ-მინისტრმა და ნოვი სადის ყოფილმა მერმა, მილოშ ვუჩევიჩმა. მარტში პარლამენტმა მისი გადადგომა დაამტკიცა. ახალ პრემიერ-მინისტრად დაინიშნა მედიცინის პროფესორი ჯურო მაწუტი, რომლის კანდიდატურაც სერბეთის პრეზიდენტმა, ალექსანდარ ვუჩიჩმა წარადგინა.