თავდაცვისა და უშიშროების საპარლამენტო კომიტეტის თავმჯდომარის პირველი მოადგილე თენგიზ შარმანაშვილი პარლამენტის დროებითი საგამოძიებო კომისიის მუშაობას აჯამებს. დეპუტატი იმედს გამოთქვამს, რომ კომისიის დასკვნის შესაბამისი დეტალები სამართლებრივი შეფასების გარეშე არ დარჩება.
„არავითარი ფასეულობა ამ დოკუმენტს არ ექნებოდა, თუ ეს მხოლოდ პოლიტიკური დეკლარაცია იქნებოდა და არ იქნებოდა მოწესრიგებული მისი იურიდიული მხარე, არ იქნებოდა მითითებული შესაბამისი წყაროები, მტკიცებულებები. ჩვენ დიდი იმედი გვაქვს, რომ არცერთი დეტალები სამართლებრივი შეფასების გარეშე არ დარჩება იმ ნაწილში, სადაც პროკურატურა ჩათვლის, რომ სისხლის სამართლის დანაშაულთან გვაქვს საქმე“, – განაცხადა შარმანაშვილმა.
პარლამენტის დროებითი საგამოძიებო კომისია 2003-2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობას სწავლობს. კომისიის დასკვნითი სხდომა დღეს გაიმართება.