აშშ-ის აერონავტიკის და კოსმოსის კვლევის ეროვნული სამმართველო (NASA) მთვარეზე ბირთვული რეაქტორის მშენებლობის გეგმას დააჩქარებს.
ამერიკული მედიის ინფორმაციით, ეს 2030 წლამდე მოხდება და აშშ-ის ამბიციური პროექტის ნაწილი იქნება, რომელიც დედამიწის ბუნებრივ თანამგზავრზე ადამიანების მუდმივი ბაზის გაშენებას ითვალისწინებს. არსებული ინფორმაციით, ანალოგიური გეგმები ჩინეთსა და რუსეთს აქვს.
მთვარეზე დღე-ღამე 4 კვირას გრძელდება, რა დროსაც 2 კვირის განმავლობაში ნათელია, შემდეგი 2 კვირის განმავლობაში კი ბნელა. ამიტომ, მზის ენერგიის გამოყენება არაპრაქტიკული იქნება. შესაბამისად, მეცნიერები თანხმდებიან, რომ ბირთვული ენერგია თანამგზავრზე ბინადარი ადამიანებისთვის ელექტროენერგიის ერთადერთი სანდო წყარო იქნება.
არსებობს კითხვების პროექტის განხორციელების უსაფრთხოებასთან დაკავშირებით. კერძოდ, რადიოაქტიური მასალების დედამიწის ატმოსფეროში გაშვების კუთხით, თუმცა სპეციალისტები ფიქრობენ, რომ ეს რისკი ტექნიკურად მოგვარებადია.
ასევე ჟღერდება მოსაზრებები, რომ აშშ და სხვა ქვეყნები მთვარისთვის რბოლაში ერთვებიან, როგორც ცივი ომის დროს იყო, რამაც შესაძლოა ზიანი მიაყენოს მეცნიერების თანამშრომლობას საერთაშორისო დონეზე.