დღეს გაერო-ს უშიშროების საბჭოს საგანგებო სხდომა გაიმართება, სადაც ისრაელის უსაფრთხოების კაბინეტის მიერ დამტკიცებულ გეგმას განიხილავენ.
გაერო-ს გენერალურმა მდივანმა, ანტონიუ გუტერეშმა გეგმას „სახიფათო ესკალაცია“ უწოდა.
გაერთიანებულმა სამეფომ, გერმანიამ, იტალიამ, ავსტრალიამ და ახალმა ზელანდიამ ერთობლივი განცხადება გაავრცელეს, რომელშიც კატეგორიულად გმობენ გეგმას და აცხადებენ, რომ ის საერთაშორისო ჰუმანიტარული სამართლის დარღვევაა. მათი თქმით, ორი სახელმწიფოს გადაწყვეტა ისრაელელებსა და პალესტინელებს შორის მდგრადი მშვიდობის მიღწევის ერთადერთ გზად რჩება.
ცნობისთვის, ისრაელის უსაფრთხოების კაბინეტმა დაამტკიცა პრემიერ-მინისტრის მიერ წარდგენილი 5-პუნქტიანი ინიციატივა ომის დასასრულებლად, სადაც საუბარია „ჰამასის“ განიარაღებაზე, მძევლების დაბრუნებაზე, ღაზის სექტორის დემილიტარიზებასა და მასზე ისრაელის უსაფრთხოების ძალების კონტროლის გავრცელებაზე, ასევე ალტერნატიული სამოქალაქო ადმინისტრაციის ჩამოყალიბებაზე.