ღაზის სექტორის სამხრეთით ისრაელი პალესტინელების იძულებით გასახლებას გეგმავს. გეგმის თანახმად, ევაკუაცია დღეს უნდა დაიწყოს.
ისრაელის არმიის პრესსპიკერის თქმით, „საბრძოლო ზონებიდან“ ევაკუაციის შემდეგ, ადგილობრივ მცხოვრებლებს კარვები და თავშესაფრის სხვა აღჭურვილობა ექნებათ. ეს განცხადება გაკეთდა ერთ კვირაზე ნაკლებ დროში მას შემდეგ, რაც ისრაელის პრემიერ-მინისტრმა ნეთანიაჰუმ განაცხადა, რომ სამხედროებს მიეცათ მწვანე შუქი, „ჰამასის“ ორი დარჩენილი დასაყრდენის „დემონტაჟის“ ნებართვა, ჩრდილოეთით ქალაქ ღაზაში და სამხრეთით მდებარე ალ-მავასიში.
ისრაელის არმიაში არ აკონკრეტებენ, განკუთვნილი იყო თუ არა თავშესაფრის აღჭურვილობა ქალაქ ღაზის მოსახლეობისთვის, რომელიც ამჟამად დაახლოებით ერთ მილიონ ადამიანს შეადგენს და იქნება თუ არა მათი გაყვანის ადგილი სამხრეთ ღაზაში რაფაჰის რაიონი.
არაბული მედიის თანახმად, ისრაელის სამხედრო ძალებმა ქალაქ ღაზაში, ალ-აჰლის საავადმყოფო დაბომბეს, რის შედეგადაც, სულ მცირე, შვიდი ადამიანი დაიღუპა. პალესტინის ჯანდაცვის სამსახურის ცნობით, ბოლო 24 საათის განმავლობაში ისრაელის მიერ გამოწვეული შიმშილით კიდევ 11 ადამიანი გარდაიცვალა, რითაც გარდაცვლილთა რიცხვი 251-მდე გაიზარდა. დაღუპულთა შორის 108 ბავშვია.