უკრაინამ სანქციები დაუწესა რუსულ, ბელარუსულ და ჩინურ კომპანიებს, რომლებიც დრონების წარმოებაში არიან ჩართული. შესაბამის განაკარგულებას უკრაინის პრეზიდენტმა, ვოლოდიმირ ზელენსკიმ მოაწერა ხელი ეროვნული უსაფრთხოებისა და თავდაცვის საბჭოს გადაწყვეტილების საფუძველზე.
შეზღუდვები დაუწესდა რუსეთის 39 მოქალაქეს, ასევე 55 რუსულ, ბელარუსულ და ჩინურ კომპანიას, საიდანაც 10 ჩინური და ორი ბელარუსული კომპანიაა, რომლებიც რუსეთს ორმაგი დანიშნულების ტექნოლოგიებს აწვდიან.
სანქციები დაუწესდა რუსეთის სამხედრო-სამრეწველო კომპლექსს და მიმართულია ხელოვნური ინტელექტის გამოყენებით დრონების მწარმოებლების და მათი მიმწოდებლების წინააღმდეგ. სანქცირებულ კომპანიებს შორის არიან ჩინეთიდან და ბელარუსიდან ელექტრონული პროდუქციის მიმწოდებლები, დრონების შექმნაზე მომუშავე რუსული კომპანიები. ასევე შეზღუდვები შეეხო თავდაცვის სფეროსთან დაკავშირებულ რუსეთის მოქალაქეებს.