სამშვიდობო შეთანხმების მისაღებად უკრაინა ამ პროცესის ნაწილი უნდა იყოს, სწორედ ამიტომ დაურეკა მათ პრეზიდენტმა, სწორედ ამიტომ ჩამოდის ხვალ პრეზიდენტი ზელენსკი რამდენიმე ევროპელ ლიდერთან ერთად, – ამის შესახებ აშშ-ის სახელმწიფო მდივანმა, მარკო რუბიომ „ეიბისისთან“ ინტერვიუში განაცხადა.
აშშ-ის სახელმწიფო მდივნის თქმით, თუ მთელი ეს ძალისხმევა არ იმუშვებს, მაშინ რუსეთისთვის დამატებითი შედეგები იქნება, მაგრამ ვაშინგტონი ცდილობს, რომ ეს თავიდან აიცილოს სამშვიდობო შეთანხმების მიღწევით.
მარკო რუბიოს განცხადებით, მიღწეულია პროგრესი იმ გაგებით, რომ დადგინდა შეთანხმების პოტენციური სფეროები, მაგრამ კვლავ რჩება უთანხმოების რამდენიმე მნიშვნელოვანი სფერო.
„თქვენ ვერ მიაღწევთ სამშვიდობო შეთანხმებას, თუ ორივე მხარე დათმობაზე არ წავა. ეს ფაქტია. ეს სიმართლეა პრაქტიკულად ნებისმიერ მოლაპარაკებაში. თუ არა, ამას უბრალოდ დანებება ჰქვია. და არცერთი მხარე არ აპირებს დანებებას. ამიტომ ორივე მხარეს მოუწევს დათმობებზე წასვლა. ასე რომ, მიუხედავად იმისა, რომ ყველას სურს, რომ ეს მოლაპარაკებები პირდაპირ ეთერში ჩატარდეს, ეს დისკუსიები საუკეთესოდ მხოლოდ მაშინ მუშაობს, როდესაც ისინი პირადად, სერიოზული მოლაპარაკებების სახით ტარდება, რომელშიც ადამიანები, რომლებსაც უკან უნდა დაბრუნდნენ და უპასუხონ ამომრჩევლებს – რადგან ავტორიტარულ მთავრობებსაც კი ჰყავთ ამომრჩევლები, რომლებსაც უწევთ უპასუხონ. ხალხი უნდა დაუბრუნდეს, დაიცვას მათ მიერ დადებული შეთანხმებები და იპოვოს გზა, თუ როგორ აუხსნას ისინი ხალხს. ასე რომ, ჩვენ უნდა შევქმნათ სივრცე დათმობებისთვის”, – განაცხადა მარკო რუბიომ.
აშშ-ის საგარეო უწყების ხელმძღვანელის თქმით, უკრაინელებს უნდა შეეძლოთ უსაფრთხოების გარანტიების მიღება, რომლებიც უზრუნველყოფს, რომ ეს აღარასდროს განმეორდება, რომ მათ ტერიტორიაზე ხელახლა არ შეიჭრებიან და ეს არის ის, რაც რუსულმა მხარემ უნდა გაიგოს. რუბიოს თქმით, პრეზიდნეტ ტრამპის კრიტიკოსები ყოველთვის იპოვიან რაიმეს გასაკრიტიკებლად, მაგრამ პუტინი უკვე არის მსოფლიო ასპარეზზე, კაცი, რომელიც უკრაინაში სრულმასშტაბიან ომს აწარმოებს.
„ის უკვე მსოფლიო ასპარეზზეა. მას მსოფლიოში უდიდესი ტაქტიკური ბირთვული არსენალი და მსოფლიოში სიდიდით მეორე სტრატეგიული ბირთვული არსენალი აქვს. ჩვენ მხოლოდ პუტინზე ვსაუბრობთ. ბოლო ოთხი ან ხუთი წლის განმავლობაში მედია მხოლოდ პუტინზე საუბრობდა. ეს არ ნიშნავს, რომ ის მართალია ომთან დაკავშირებით. ეს არ ნიშნავს, რომ ის გამართლებულია ომთან დაკავშირებით. ეს ყველაფერი გვერდზე გადადეთ. ეს ნიშნავს, რომ რუსეთსა და უკრაინას შორის სამშვიდობო შეთანხმება არ დაიდება. პუტინთან ურთიერთობის გარეშე რუსეთსა და უკრაინას შორის ომს ვერ დაასრულებ. ეს უბრალოდ საღი აზრია. პრეზიდენტს შეეძლო უბრალოდ ეთქვა: „ეს ბაიდენის ომია. ის მის დროს დაიწყო. ჩვენ ყველაფერს გავაკეთებთ უკრაინისთვის, მაგრამ სხვა საკითხებზე გავამახვილებთ ყურადღებას”. მას ამის თქმა ადვილად შეეძლო, მაგრამ ის მსოფლიოში ერთადერთი ლიდერია, რომელმაც შეძლო პუტინის შეხვედრაზე მიყვანა და სერიოზულ საკითხებზე საუბარი…ყველა, მათ შორის უკრაინელები და ევროპის ყველა ქვეყანა, ევედრება შეერთებულ შტატებს, ჩაერთოს, პუტინთან და შეეცადოს, დათანხმდეს სამშვიდობო შეთანხმებაზე. ისინი ყველა გვთხოვენ ამის გაკეთებას. და როგორც კი ახალ სანქციებს დააწესებთ, ეს მოლაპარაკებები, სავარაუდოდ, უახლოეს მომავალში შეწყდება და ეს ნიშნავს, რომ ომი უახლოეს მომავალში გაგრძელდება. იმედი მაქვს, ეს არ მოხდება. შესაძლოა, იქ აღმოვჩნდეთ, მაგრამ ყველაფერს გავაკეთებთ ამის თავიდან ასაცილებლად, რადგან გვსურს სამშვიდობო შეთანხმების მიღწევა”, – აღნიშნა მარკო რუბიომ.