ბელარუსი და ირანი შეთანხმდნენ, რომ სტრატეგიული თანამშრომლობის ხელშეკრულებას გააფორმებენ. ამის შესახებ ბელარუსის პრეზიდენტმა, ალექსანდრ ლუკაშენკომ მინსკში ირანის პრეზიდენტთან, მასუდ ფეზეშქიანთან მოლაპარაკებების შემდეგ განაცხადა.
ლუკაშენკომ ირანელ კოლეგასთან გამართულ მოლაპარაკებებს შინაარსიანი, თბილი და კონსტრუქციული უწოდა და თქვა, რომ მხარეებმა მიაღწიეს კარგ შედეგებს, რომლებიც ორმხრივ ურთიერთობებში პოზიტიური ნაბიჯების გადადგმას უწყობს ხელს.
„ამ ნაბიჯების კარგი შედეგი იქნება, თუ ჩვენ უახლოეს პერიოდში, როგორც შევთანხმდით პრეზიდენტთან, მოვამზადებთ და ხელს მოვაწერთ სტრატეგიული თანამშრომლობის შესახებ შეთანხმებას“, – აღნიშნა ალექსანდრ ლუკაშნეკომ.
ლუკაშენკოს განცხადებით, ბელარუსი ირანს მნიშვნელოვან პოლიტიკურ და ეკონომიკურ პარტნიორად განიხილავს.
ბელარუსის ლიდერმა ასევე ეკონომიკური ტერორიზმი უწოდა მინსკისა და თეირანის წინააღმდეგ დასავლეთის მიერ დაწესებულ სანქციებს და თქვა, რომ ბელარუსი მხარს უჭერს ირანის ლეგიტიმურ უფლებას, განავითაროს მშვიდობიანი ატომური ენერგეტიკა.
თავის მხრივ, ირანის პრეზიდენტმა მადლობა გადაუხადა ბელარუს კოლეგას ირანის ატომურ ობიექტებზე განხორციელებულ დარტყმებთან დაკავშირებით გამოხატული პოზიციისთვის და თქვა, რომ ირანი მზად არის, ითანამშრომლოს ბელარუსთან „უკანონო დასავლური სანქციების ნეიტრალიზაციისთვის“.