აშშ-ის ეროვნული დაზვერვის ხელმძღვანელის ტულსი გაბარდის განცხადებით, ის „დიფ სთეითის“ აღმოფხვრის მიზნით უწყებიდან თანამშრომლების 40%-ზე მეტს გაუშვებს.
პერსონალის შემცირებით სახელმწიფო ბიუჯეტი წლიურად 700 მილიონი დოლარს დაზოგავს. გაბარდი ამბობს, რომ ეს არა მხოლოდ გაბერილი ბიუროკრატიული აპარატის შემცირება, არამედ უწყების „დიფ სთეითის“ წარმომადგენლებისგან გაწმენდაა.
„ეროვნული დაზვერვის დირექტორის ოფისი 11 სექტემბრის ტერორისტული აქტის შემდეგ შეიქმნა. მას ძალიან მნიშვნელოვანი მისია დაეკისრა. 20 წლის შემდეგ ჩვენ კვლავ აქ ვსხედვართ. სამსახური ზომაში ორჯერ გაიზარდა, გაიბერა ბიუროკრატიით, ფლანგავს გადასახადების გადამხდელთა დოლარებს, მაგრამ რეალურად ხელს უშლის იმ მისიას, რისთვისაც თავდაპირველად შეიქმნა. როგორც თქვენ აღნიშნეთ, ის პოლიტიზებულია, რომლის ნაწილიც ჩვენ გამოვავლინეთ და ბოლო რამდენიმე კვირის განმავლობაში გავასაჯაროვეთ კიდეც. გავასაჯაროვეთ, რაც წინა დირექტორებისა და ადმინისტრაციების დროს მოხდა. ჩვენი მიზანია „დიფ სთეითის“ წარმომადგენლების აღმოფხვრა, მათი, ვინც ფიცს არღვევდა, რომელსაც დაზვერვის ყველა წევრი დებს ამერიკის კონსტიტუციის წინაშე. დღევანდელი გადაწყვეტილება პირველი ნაბიჯია „დიფ სთეითის“ წევრების გამოსავლენად და იმაზე ფოკუსირებისთვის, რასაც ამერიკელი ხალხი იმსახურებს“, – თქვა გაბარდმა.