აშშ-ის პრეზიდენტი დონალდ ტრამპი ვარაუდობს, რომ ვლადიმერ პუტინი, შესაძლოა, 2026 წლის მსოფლიო საფეხბურთო ჩემპიონატზე ჩავიდეს, რომელსაც აშშ მასპინძლობს. შესაბამისი განცხადება ტრამპმა თეთრ სახლში ჟურნალისტებთან საუბრისას გააკეთა.
ტრამპმა ოვალურ კაბინეტში საფეხბურთო ჩემპიონატისადმი მიძღვნილ ღონისძიებაზე ჟურნალისტებს აჩვენა ალასკაზე აშშ-ისა და რუსეთის სამიტზე გადაღებული ფოტო, სადაც იგი პუტინთან ერთადაა აღბეჭდილი.
„ეს არის ადამიანი, სახელად ვლადიმერ პუტინი, რომელიც, დარწმუნებული ვარ, ჩამოვა მსოფლიო ჩემპიონატზე. ეს დამოკიდებულია იმაზე, რა მოხდება. მას შეუძლია, ჩამოვიდეს ან საერთოდ არ ჩამოვიდეს – იმის მიხედვით, როგორ განვითარდება მოვლენები. უახლოეს რამდენიმე კვირაში ბევრი რამ მოხდება, მაგრამ მე ვიფიქრე, რომ ეს კარგი ფოტოა“, – განაცხადა ტრამპმა.
ტრამპმა განმარტა, რომ ეს სურათი მას იმ ადამიანმა გამოუგზავნა, რომელსაც „ძალიან სურს ჩასვლა“ აშშ-ში და დაამატა, რომ ფოტოზე ხელს მოაწერს მისთვის.
ცნობისთვის, მსოფლიო საფეხბურთო ჩემპიონატი 2026 წელს აშშ-ში, მექსიკაში და კანადაში 11 ივნისიდან 19 ივლისამდე გაიმართება. რუსეთის ეროვნული ნაკრები საერთაშორისო ტურნირებში მონაწილეობას 2022 წლის თებერვლიდან ვერ იღებს.