პირველი აფეთქების ხმა ღაზის სექტორის ქალაქ დეირ ალ-ბალაჰში გვიან ღამით გაისმა, რითაც ადგილობრივების ინფორმაციით, მორიგი თავდასხმების სერია დაიწყო. ისრაელის იერიშს მსხვერპლი არ მოჰყოლია. ღაზაში მცხოვრები მოსახლეობა ამბობს, რომ “ცაჰალმა” ისინი წინასწარ გააფრთხილა და ევაკუაციისკენ მოუწოდა. შესაბამისად, შენობებში მშვიდობიანი მოქალაქეები არ იმყოფებოდნენ და არავინ დაშავებულა.
განსხვავებული ვითარებაა ქალაქ ხან იუნისში, სადაც ისრაელის იერიშების შედეგად გარდაცვლილებს გლოვობენ.
პარალელურად, ღაზაში ჰუმანიტარული კრიზისია. ადგილობრივი მოსახლეობა ამბობს, რომ ადამიანები შიმშილის გამო ყოველდღე იღუპებიან.
კრიტიკულ ვითარებაში არიან ტერორისტულ ორგანიზაცია “ჰამასის” ტყვეობაში მყოფები. ბოლო ვიდეოში, რომელიც “ჰამასის” მებრძოლებმა გამოაქვეყნეს, ისრაელელი მძევალი ჩანს, რომელსაც ტერორისტული ორგანიზაცია სავარაუდოდ შიმშილს აიძულებს.
სწორედ მძევლების გათავისუფლებას და ტყვეების ისრაელში დაბრუნებას მოითხოვენ ყოველდღე ისრაელის მოქალაქეები თელ-ავივის ქუჩებში.
ქვეყნის პრემიერ-მინისტრი, ბენიამინ ნეთანიაჰუ ირწმუნება, რომ ყველა მძევალს სამშობლოში დააბრუნებს. იქამდე კი, ბენიამინ ნეთანიაჰუ ომის შეწყვეტას არ აპირებს. “ცაჰალმა” რამდენიმე დღის წინ ღაზის აღების ახალი გეგმაც დაამტკიცა.
ღაზის სექტორსა და ისრაელს შორის ომი 2023 წლის 7 ოქტომბერს, მას შემდეგ დაიწყო, რაც “ჰამასმა”, “ცაჰალის” ცნობით, სამხრეთ ისრაელში 1200 ადამიანი მოკლა, 250-მდე კი მძევლად აიყვანა. “ცაჰალმა” ანკლავში სამხედრო ოპერაცია დაიწყო. შედეგად, ღაზის ჯანდაცვის სამინისტროს ინფორმაციით, 62 000-ზე მეტი პალესტინელი დაიღუპა, მათ შორის 50 000-მდე ბავშვი.