პოლონეთი ვეღარ გადაიხდის უკრაინისთვის Starlink-ის მომსახურებას. ამის მიზეზი პრეზიდენტ კაროლ ნავროცკის ვეტო გახდა, რომელიც მან უკრაინელი ლტოლვილების დახმარების შესახებ კანონს დაადო. ამის შესახებ პოლონეთის ციფრული ტრანსფორმაციის მინისტრმა, კშიშტოფ გავკოვსკიმ განაცხადა.
„პრეზიდენტის ვეტო ბრმად მოქმედებს! კაროლ ნავროცკი თავისი გადაწყვეტილებით უკრაინას ინტერნეტს უთიშავს, რადგან დე ფაქტო ეს ნიშნავს, რომ მისი გადაწყვეტილება უკრაინის მოქალაქეებისთვის დახმარების შესახებ კანონს შეეხო. ეს არის Starlink-ის ინტერნეტის დასასრული, რომელსაც პოლონეთი ომში მყოფ უკრაინას აწვდიდა. ეს ასევე არის უკრაინის ადმინისტრაციის მონაცემების უსაფრთხო ადგილას შენახვის მხარდაჭერის დასასრული,“ – აღნიშნა პოლონელმა მინისტრმა.
გავკოვსკის აზრით, ეს გადაწყვეტილება რუსული ჯარებისთვის „საჩუქარია“. მისი თქმით, უკრაინელი სამხედროები Starlink-ს რეგულარულად იყენებენ.
მანამდე პოლონეთის პრეზიდენტმა ვეტო დაადო კანონს, რომელიც უკრაინელი ლტოლვილებისთვის დახმარებას ეხება.
ნავროცკიმ აღნიშნა, რომ უკრაინაში რუსეთის სრულმასშტაბიანი ომის 3.5 წლის განმავლობაში პოლონეთის სტრატეგიული ინტერესები არ შეცვლილა და რუსეთი უსაფრთხოებისთვის უდიდეს საფრთხეს წარმოადგენს.
თუმცა, მისი თქმით, ფინანსებისა და საზოგადოებრივი განწყობის სფეროში ვითარება არსებითად შეიცვალა.