მანჩო გიორგობიანი საზოგადოებას თხოვნით მიმართავს და თანადგომისკენ მოუწოდებს.
მანჩო გიორგობიანი “ფოსტალიონთან” ინტერვიუში ქართველი მხატვრის, ელენე ახვლედიანის შვილიშვილის, ირაკლი ახვლედიანის დასახმარებლად საზოგადოებას დახმარებისკენ მოუწოდებს:
“ირაკლი ახვლედიანი ჩემი ბავშვობის მეგობიარია, მშობლებსაც ახლოს ვიცნობდი, მაგრამ ამას მნიშვნელობა არ აქვს. მე, როგორც საქართველოს მოქალაქე, ვთვლი, რომ ამ ოჯახისგან ყველა ძალიან დავალებულები ვართ. 80-იან წლებში, ირაკლის მამამ და ბაბუამ ელენე ახვლედიანის კუთვნილი სახლი და 3600-მდე ნახატი უსასყიდლოდ გადასცეს სახელმწიფოს. კულტურის სამინისტრო საქმის კურსშია და მე დიდი იმედი მაქვს, რომ მოძებნიან რამე ფორმას, მონაწილეობა მიიღონ ირაკლის დახმარებაში. არა მხოლოდ კულტურის სამინისტრო, არამედ საერთოდ, ხელისუფლება უნდა დაინტერესდეს ამ ოჯახის მდგომარეობით. ირაკლი ისევე, როგორც მისი მამა და ბაბუა, სახელმწიფოებრივად მოაზროვნე ადამიანია. ის არაფერს ითხოვს და არ მიაჩნია, რომ მის წინაშე სახელმწიფო ვალდებულია. მაგრამ მე რომ ხელისუფლებას წარმოვადგენდე, იმ 3600 ნახატიდან ერთ ცალს უკან დავუბრუნებდი და თვითონ ელენე ახვლედიანი გადაარჩენდა თავის შვილიშვილს. ვფიქრობ, საქართველოს დიდი სირცხვილი იქნება, თუ ოჯახი, რომელმაც შეუფასებელი სიმდიდრე აჩუქა ქვეყანას, ქუჩაში დარჩება. მათ მკურნალობის თანხა დაჭირდათ, სესხი აიღეს , პროცენტებს იხდიდნენ, მაგრამ 2 თვე დააგვიანდათ და ბინა მაშინვე დაისაკუთრა მევახშემ”, – ამბობს მანჩო გიორგობიანი.
ირაკლი ახვლედიანის დასახმარებლად მოეწყობა აუქციონი, სადაც ხელოვანების მიერ შემოწირული ნახატები, ხელნაკეთი ნივთები და ფოტოები გაიყიდება:
“მხოლოდ დიდი მხატვრების ნამუშევრებზე არ არის საუბარი. ვთხოვ ყველა მხატვარს, ფოტოგრაფს, რასაც გაიმეტებენ, მოგვიტანონ. აგრეთვე ვთხოვ ყველას, ვისაც შესაძლებლობა აქვს, მოვიდეს აუქციონზე, რომელიც 31 მაისს, 7 საათზე პიონერთა სასახლეში გაიმართება და შეიძინოს იქ გამოტანილი ნივთები. facebook.com/events – აი ეს ფორმა მოვნახეთ პრობლემის მოსაგვარებლად იმიტომ, რომ ქვეყნის სირცხვილი იქნება ელენე ახვლედიანის შთამომავალი პატარა ბავშვებით ქუჩაში რომ დარჩეს” – განაცხადა მანჩო გიორგობიანმა.
