ნეპალის პრეზიდენტმა პარლამენტი დაითხოვა და ახალი არჩევნები 2026 წლის 5 მარტს დანიშნა. შესაბამის ინფორმაციას ადგილობრივი მედია ავრცელებს.
პრეზიდენტმა რამჩანდრა პაუდელიმ წარმომადგენელთა პალატის დათხოვნის განკარგულება მას შემდეგ გასცა, რაც ქვეყნის დროებით პრემიერ-მინისტრად ყოფილი მთავარი მოსამართლე სუშილა კარკი დაინიშნა. ფიცის დადების შემდეგ მან პრეზიდენტს პარლამენტის დათხოვნის რეკომენდაციით მიიმართა.
სუშილა კარკი ნეპალის ერთადერთი ქალი მთავარი მოსამართლე იყო. ის აღნიშნულ თანამდებობას დაახლოებით ერთი წლის განმავლობაში, 2016-2017 წლებში იკავებდა. დემონსტრანტებმა ნეპალის დროებით პრემიერ-მინისტრის პოსტზე კირკის კანდიდატურა სოციალურ ქსელ Discord-ში ხმის მიცემის გზით აარჩიეს.
ნეპალში პრემიერ-მინისტრი შარმა ოლი საპროტესტო გამოსვლებისა და მასობრივი არეულობების შედეგად გადადგა. მიმდინარე კვირას, არეულობისას ნეპალში 51 ადამიანი დაიღუპა, 1 300 კი დაშავდა. დემონსტრაციები სოციალური მედიის აკრძალვის გამო დაიწყო და მოგვიანებით ანტიკორუფციულ გამოსვლებში გადაიზარდა. საპროტესტო აქციებში ძირითადად GenZ-ის წარმომადგენლები მონაწილეობდნენ.