მეორე დღეა, მადრიდში აშშ-ჩინეთის მოლაპარაკებები გრძელდება. აშშ-ის და ჩინეთის დელეგაციები სავაჭრო საკითხებს, ეროვნულ უსაფრთხოებას და ვიდეო აპლიკაცია „ტიკტოკის“ საკუთრების საკითხებს განიხილავენ.
როგორც „როიტერი“ წერს, ესპანეთის საგარეო საქმეთა სამინისტროში კვირას დაწყებული მოლაპარაკების პირველი დღე ექვსი საათის განმავლობაში გაგრძელდა, თუმცა მხარეებმა შეთანხმებას ვერ მიაღწიეს.
გამოცემის ცნობით, აშშ-ის ფინანსთა მინისტრის, სკოტ ბესენტისა და ჩინეთის ვიცე-პრემიერის, ჰე ლიფენგის ხელმძღვანელობით დელეგაციები ევროპის ქალაქებში შეხვედრებს მაისიდან მართავენ.
დელეგაციები ბოლოს სტოკჰოლმში შეხვდნენ, სადაც ისინი შეთანხმდნენ 90 დღით გახანგრძლივებული სავაჭრო ზავის შესახებ, რამაც ურთიერთსაწინააღმდეგო მაღალი ტარიფების დაწესება შეაჩერა.
მხარეებს შორის მოლაპარაკებების სერია არის მცდელობა, თავიდან აიცილონ აშშ-ჩინეთის დაძაბული ურთიერთობების ნგრევა პრეზიდენტ დონალდ ტრამპის მიერ დაწესებული მძიმე ტარიფების გამო.