უკრაინის პრეზიდენტმა, ვოლოდიმირ ზელენსკიმ განაცხადა, რომ თუ ომი 2026 წელსაც გაგრძელდება, ქვეყანას 120 მილიარდი დოლარის დეფიციტი შეექმნება. ამის შესახებ მან ევროპარლამენტის პრეზიდენტთან, რობერტა მეცოლასთან ერთად გამართულ ბრიფინგზე ისაუბრა.
„ომის ფასი, მაგალითად, დღეს, წელიწადში 120 მილიარდ დოლარს შეადგენს“, – აღნიშნა ზელენსკიმ.
მისი თქმით, ამ თანხის ნახევარი, 60 მილიარდი დოლარი, უკრაინის ბიუჯეტიდან იფარება. პრეზიდენტმა ხაზგასმით აღნიშნა, რომ „დანარჩენი 60 მილიარდი მომავალ წელს უნდა მოძებნოს“.
„ვიმედოვნებ, რომ ამ ომს დავასრულებთ, მაგრამ ნებისმიერ შემთხვევაში, გეგმა „ა“ მისი დასრულებაა. გეგმა „ბ“ კი 120 მილიარდია. ამიტომაც, ეს დიდი გამოწვევაა“, – განაცხადა ზელენსკიმ.
მან დააზუსტა, რომ ამხელა თანხა მშვიდობის პირობებში, ცეცხლის შეწყვეტის რეჟიმის ან უსაფრთხოების გარანტიების პირობებში, საჭირო არ იქნება.