საქართველოს ეროვნული ბანკის პრეზიდენტი ნათია თურნავა მსოფლიო ბანკის რეზერვების მართვის საკონსულტაციო პროგრამის (RAMP) მისიის წარმომადგენლებს – გილერმე ალვეშს, ჰენრი ჰუასა და ჟერომ ტელეტშს შეხვდა.
ეროვნული ბანკის პრესსამსახურის ცნობით, შეხვედრას ასევე ესწრებოდა ფინანსური ბაზრების დეპარტამენტის უფროსი ალექსანდრე ხაზარაძე.
შეხვედრაზე განიხილეს მიმდინარე თანამშრომლობის საკითხები. მათ შორის, ტაქტიკური აქტივების განაწილების (TAA) ჩარჩოს დანერგვა/განვითარება, სავალუტო რეზერვების საინვესტიციო სტრატეგიის განახლება და ოქროს მართვის პოლიტიკის სრულყოფა, ასევე სამომავლო თანამშრომლობის გეგმები.
ნათია თურნავამ მადლობა გადაუხადა მსოფლიო ბანკის RAMP-ის გუნდს ტექნიკური დახმარებისა და მუდმივი მხარდაჭერისთვის. მან აგრეთვე ხაზი გაუსვა ეროვნული ბანკის მზადყოფნას, გააგრძელოს საერთაშორისო სავალუტო რეზერვების მართვის გამოცდილების გაზიარება სხვა ცენტრალურ ბანკებთან RAMP-ის ფარგლებში და განაგრძოს აქტიური კონტრიბუცია პროგრამის წარმატებისთვის.