ესტონული ტელეგადაცემა „აქტუალური კამერის“ (Aktuaalne kaamera) ცნობით, მიმდინარე წლის პირველ ცხრა თვეში ესტონეთში 50-ზე მეტი ონლაინ-პედოფილი დააკავეს.
ექსპერტების შეფასებით, ონლაინ-პედოფილების გამოვლენის და დაკავების ასეთი „მნიშვნელოვანი“ ზრდა ესტონეთის პოლიციისა და საზღვრის დაცვის დეპარტამენტის (PPA) მიზანმიმართული მუშაობის შედეგია. როდესაც აღნიშნული სპეციალური საპოლიციო დანაყოფი შეიქმნა, მიაჩნდათ, რომ 50 ონლაინ-პედოფილის დაკავება მთელი წლის საპროგნოზო ჯამური მაჩვენებელი იქნებოდა, მაგრამ ამ რაოდენობის დამნაშავეების დაკავება უკვე მიმდინარე წლის 9 თვეში მოხდა.
PPA-ს ჩრდილოეთ პრეფექტურის მძიმე დანაშაულებათა განყოფილების უფროსი, ელარი ჰაუგასი დარწმუნებულია, რომ წლის ბოლომდე ეს რიცხვი კიდევ უფრო გაიზრდება.
„წელს კიდევ უფრო მეტი ასეთი დამნაშავეს გამოვავლენთ და დავაკავებთ. ბოლო ასეთი ფაქტი ხუთშაბათს დილით მოხდა. რადგან ეს მიმდინარე გამოძიებაა, დეტალებში ვერ შევალ, მხოლოდ იმას ვიტყვი, რომ ეჭვმიტანილი უკვე დაკავებულია, საპროცესო მოქმედებები ჩატარდა და რიგი მალე სხვა პირებამდეც მივა“, – განაცხადა ჰაუგასმა.
პრობლემა ასევე „მწვავედ და შემაშფოთებლად“ მიაჩნიათ ბავშვთა ფსიქოლოგებსაც.
მითუმეტეს – გავრცელებული ინფორმაციით, მსხვერპლთა შორის რვა წლის ბავშვებიც არიან.
„სექსუალური ძალადობის მსხვერპლი ბავშვების რიცხვი და ზოგადად, სექსუალური ძალადობის საკითხი, ბოლო წლებში ეპიდემიურ მასშტაბებს იძენს. კვირა ისე არ გავა, რომ არ მივიღოთ ახალი სიგნალი ბავშვის ან ახალგაზრდის შესახებ, რომელიც, სავარაუდოდ, სექსუალური ძალადობის მსხვერპლი გახდა“, – ამბობს ბავშვთა ფსიქოლოგი, მარიანა საქსნიიტი.
დამნაშავის იდენტიფიცირებისა და რისკების შეფასების შემდეგ, PPA სწრაფი რეაგირების ჯგუფს აგზავნის პირის დასაკავებლად, რაც ზოგჯერ ფიზიკურ შეჭრასაც საჭიროებს.
„თუ ვიდეოებში ჩანს, რომ შეღწევა აივნებიდან განხორციელდა, ეს ის შემთხვევებია, როდესაც კარი ნებაყოფლობით არ გააღეს. იძულებითი შეღწევის შემთხვევაში, თუ ვიცით, რომ პირი ბინაშია და კარის გაღებაზე უარს ამბობს, ვიღებთ ყველა ზომას, რაც აუცილებელია ამ პირის დასაკავებლად“, – განაგრძობს ჰაუგასი.
საქსნიიტის თქმით, ერთ-ერთი პრევენციული ღონისძიება შეიძლება იყოს ადრეული ასაკის ბავშვთა სწავლებაში სექსუალური განათლების შემოღება.
PPA-ში გეგმავენ, კიდევ უფრო მეტი რესურსი გამოუყონ დანაშაულის წინააღმდეგ ბრძოლის დანაყოფს, რათა ძალადობის მსხვერპლ არასრულწლოვნებს მან რაც შეიძლება სწრაფად გაუწიოს ქმედითი დახმარება.
არასრულწლოვნის სექსუალური შევიწროებისთვის ესტონეთის მოქმედი კანონმდებლობა სამ წლამდე თავისუფლების აღკვეთას ითვალისწინებს.