უნგრეთის პრემიერ-მინისტრის, ვიქტორ ორბანის განცხადებით, უნგრეთისა და ამერიკის ურთიერთობები განსაკუთრებულად მტკიცეა. ამის შესახებ ორბანმა ვაშინგტონში, დონალდ ტრამპთან შეხვედრის დაწყებამდე მედიასთან ისაუბრა.
ვიქტორ ორბანის თქმით, 2010 წლიდან უნგრეთი პირველი დასავლური ქვეყანა გახდა, რომელმაც უარი თქვა ლიბერალურ მმართველობაზე და აირჩია კონსერვატიული, ქრისტიანულ-ნაციონალური მოდელი. ამ გზის სისწორე, ორბანის თქმით, დამტკიცდა 2016 წელს დონალდ ტრამპის პრეზიდენტად არჩევით.
უნგრეთის პრემიერ-მინისტრის განცხადებით, ჯო ბაიდენის ადმინისტრაციამ ორმხრივ ურთიერთობებს მძიმე ზიანი მიაყენა, დააწესა სანქციები და შეაჩერა თავდაცვის სფეროში თანამშრომლობა. ორბანის განცხადებით, ეს პოლიტიკა შეიცვალა დონალდ ტრამპის თანამდებობაზე დაბრუნების შემდეგ.
„ოდესმე თუ არსებობდა ოქროს ხანა ამერიკულ-უნგრულ ურთიერთობებს შორის, ეს არის დონალდ ტრამპის დროს. თანამშრომლობა პოლიტიკაში, ბიზნესსა და განათლებაში არასოდეს ყოფილა ასეთი ძლიერი. ჰარმონიაა ჩვენს მთავრობებს შორის მშვიდობის, მიგრაციისა და ოჯახური ღირებულებების საკითხებში,“ – აღნიშნა უნგრეთის პრემიერ-მინისტრმა.
ვიქტორ ორბანმა ინტერვიუში ისაუბრა დონალდ ტრამპთან დაგეგმილ შეხვედრაზეც და ენერგეტიკულ სფეროში აშშ-ის მიერ დაწესებული სანქციები მთავარ პრიორიტეტად დაასახელა.
ამასთან, უნგრეთის პრემიერ-მინისტრმა გააკრიტიკა ბრიუსელის ხედვა უკრაინაში ომის დასრულებასთან დაკავშირებით. ვიქტორ ორბანის შეფასებით, უკრაინას მომდევნო ოთხი წლის განმავლობაში დასჭირდება რესურსები, რომლის ღირებულებაც თითქმის ორჯერ აღემატება უნგრეთის წლიურ მთლიან შიდა პროდუქტს.
„უნგრეთმა არ გაგზავნა და არც გაგზავნის იარაღს, ჯარისკაცებს ან ფულს კონფლიქტში,“ – განაცხადა ვიქტორ ორბანმა.
მისივე თქმით, უნგრეთი ზარალდება უზარმაზარი ზეწოლისაგან – როგორც შიდა, ასევე გარე ზეწოლისგან.