საქართველოს პრემიერ-მინისტრმა ირაკლი კობახიძემ პარლამენტში ინტერპელაციის წესით დასმულ კითხვებს უპასუხა.
მთავრობის მეთაურმა „იგლ ჰილსის“ უმსხვილეს საინვესტიციო პროექტსა და უმაღლესი განათლების სისტემის რეფორმაზე ისაუბრა.
ირაკლი კობახიძემ დეტალურად განმარტა სახელმწიფოსა და „იგლ ჰილსს“ შორის გაფორმებული ხელშეკრულებით გათვალისწინებული პირობები და აღნიშნა, რომ პროექტის განხორციელების ეტაპზე 24 ათასზე მეტი სამუშაო ადგილი შეიქმნება, ხოლო დასრულების შემდეგ მუდმივად დასაქმდება – 8 ათასზე მეტი ადამიანი.
„მარტო ერთ საინვესტიციო პროექტს ბიუჯეტში შემოაქვს წელიწადში საშუალოდ 700 მილიონი ლარი. მთლიანი ეფექტი საქართველოს ეკონომიკაზე იქნება, დაახლოებით 11 მლრდ ლარი, რაც არის ძალიან დიდი მაჩვენებელი. საუბარია კოლოსალურ ეკონომიკურ მოგებაზე, რომელსაც ამ პროექტიდან მიიღებს ჩვენი სახელმწიფო“, – განაცხადა ირაკლი კობახიძემ.
პრემიერ-მინისტრმა ასევე ყურადღება გაამახვილა კომპანიის საერთაშორისო რეპუტაციაზე და აღნიშნა, რომ მსგავსი დონის ინვესტორის შემოსვლა ქვეყანაში მნიშვნელოვანი გზავნილია სხვა ინვესტორებისთვისაც. მთავრობის მეთაური ხელშეკრულების გასაჯაროებასთან დაკავშირებით ოპონენტების მოწოდებებსაც გამოეხმაურა და განაცხადა, რომ შეთანხმებისთვის კომერციული საიდუმლოების სტატუსის მინიჭება საერთაშორისო პრაქტიკაა.
„გასული 10 წლის განმავლობაში, კომერციული საიდუმლოების სტატუსი მიენიჭა საქართველოს მთავრობის მიერ მხოლოდ ეკონომიკის სფეროში გაფორმებულ 1554 ხელშეკრულებას, მათ შორის არის ანაკლიის ხელშეკრულება. სწორედ ის ადამიანები, რომლებიც თავის დროზე ითხოვდნენ ანაკლიის შესახებ ხელშეკრულების გასაიდუმლოებას, დღეს იწუნებენ იმ ფაქტს, რომ არ არის გასაჯაროებული კომპანია Eagle Hills-სთან დადებული ხელშეკრულება“, – განაცხადა ირაკლი კობახიძემ.
მთავრობის მეთაურის შეფასებით, არსებობს თემები, რომლებზე სპეკულაციაც მიუღებელია მაშინაც კი, როცა ხარ „ნაცმოძრაობის“, „ლელოს“, ან „ალტ ინფოს“ წარმომადგენელი.
„როდესაც იცი, რომ ასრულებ დაკვეთას და ამ დაკვეთის მიზანია, საქართველოს ეკონომიკას დააკლდეს 11 მლრდ ლარი, ბიუჯეტს დააკლდეს წელიწადში 700 მლნ ლარი, როცა იცი, რომ ამ დაკვეთის მიზანია, არ შეიქმნას საქართველოში 24 000 დროებითი და 8 000 მუდმივი სამუშაო ადგილი, ამავდროულად, როცა იცი, რომ რეალურად არავითარი არაბული ქალაქები ქვეყანაში არ შენდება, უბრალოდ არ უნდა იკადრო სპეკულაცია. არის რაღაცები, სადაც, „ნაცი“, „ლელო“ და „ალტ ინფო“ რომ ხარ, მაშინაც კი არ უნდა იკადრო სპეკულაციები, თუმცა ვხედავთ, როგორია ამ ადამიანების მორალი“, – აღნიშნა პრემიერმა.
მთავრობის მეთაურმა ინტერპელაციის ფორმატში ასევე ისაუბრა უმაღლესი განათლების სისტემის რეფორმაზე და იმ გამოწვევებზე, რომლებიც დღეს ამ სფეროში არსებობს. ირაკლი კობახიძემ დეტალურად განმარტა განათლების სისტემაში არსებული 7 ძირითადი გამოწვევა და რეფორმის უმთავრეს ამოცანად ქვეყანაში განათლების ხარისხის თვისებრივი ცვლილება დაასახელა.
„დღეს არის ერთი წამყვანი კერა – თბილისი და გვინდა, ქუთაისი ვაქციოთ რიგით მეორე კერად უმაღლესი განათლების მიმართულებით. ამისათვის ქუთაისში უნდა შეიქმნას სრულიად ახალი, თანამედროვე სტანდარტების ინფრასტრუქტურა. ასევე გვინდა, განვავითაროთ რეგიონული უნივერსიტეტების რესურსები ყველა მიმართულებით, მათ შორის, ინფრასტრუქტურა, საერთო საცხოვრებლები და ა.შ. რათა რეგიონულმა უნივერსიტეტებმა შეძლონ მეტი სტუდენტის მიღება. ჩვენი პასუხისმგებლობა და ვალდებულებაა, განსაკუთრებული ყურადღება დავუთმოთ სწორედ უმაღლესი განათლების სისტემის გაჯანსაღებას და ხარისხის გაუმჯობესებას“, – განაცხადა ირაკლი კობახიძემ.
პრემიერ-მინისტრმა საკადრო პოლიტიკის გადახედვისა და შრომის ბაზრის მოთხოვნების შესაბამისი პროფესიული პროგრამების მხარდაჭერის აუცილებლობაზე ისაუბრა, ასევე ხაზი გაუსვა სახელმძღვანელოებისა და ინფრასტრუქტურის თვისებრივად გაუმჯობესების განსაკუთრებულ მნიშვნელობას.
„ვფიქრობთ, რომ საკადრო პოლიტიკა უნდა გადაიხედოს და შეიქმნას სახელმწიფო უნივერსიტეტებში ბირთვი სრულ განაკვეთზე მომუშავე პროფესორების სახით. ეს არის პრინციპულად მნიშვნელოვანი. მათ უნდა ჰქონდეთ სათანადო სამუშაო პირობები და მაღალი ანაზღაურება. ჩვენ ვფიქრობთ, რომ სრულ განაკვეთზე მომუშავე სრული პროფესორის ანაზღაურება უნდა აღემატებოდეს ხელზე 10 ათას ლარს. არ შეიძლება, წინასწარ გაწირო სტუდენტი დაუსაქმებლობისთვის. არ შეიძლება, მოამზადო იურისტად და მერე დაახვედრო შრომის ბაზარი, სადაც ამდენ იურისტზე მოთხოვნა არ არის. ამიტომ, ერთ-ერთი ძირითადი მიმართულება არის შრომის ბაზრის ანალიზი, რაზეც მუშაობა დაწყებულია. თუ საჯარო და კერძო სექტორი ერთად გავაანალიზებთ შრომის ბაზრის მოთხოვნებს, ბუნებრივია, გავალთ ოპტიმალურ მაჩვენებლებზე და, სწორედ, ამას უნდა დაეფუძნოს მომავალში სტუდენტების მიღება სხვადასხვა სპეციალობაზე“, – განაცხადა პრემიერ-მინისტრმა.
მთავრობის მეთაურმა ხაზგასმით აღნიშნა, რომ განათლების სისტემის რეფორმის კონცეფცია სრულ შესაბამისობაშია ბოლონიის პროცესის მოთხოვნებთან.
„განათლების რეფორმა არის ერთ-ერთი უმთავრესი ეროვნული ამოცანა. კიდევ ერთხელ უნდა ვაღიაროთ, რომ ეს არის ის მიმართულება, სადაც ყველაზე ნაკლები გაკეთდა გასული 13 წლის განმავლობაში და რა თქმა უნდა, ეს გვაკისრებს კიდევ უფრო მეტ პასუხისმგებლობას, მაქსიმალურად ვიზრუნოთ უმაღლესი განათლების რეფორმის გატარებაზე. ისეთივე წარმატებით გავატარებთ ამ რეფორმას, როგორ წარმატებითაც პირადად მე უზრუნველვყავი 7 არჩევნების მოგება, როგორც შტაბის ხელმძღვანელმა“, – განაცხადა ირაკლი კობახიძემ.
