მოლდოვის პრეზიდენტი რუმინეთთან შესაძლო გაერთიანებაზე საუბრობს. მაია სანდუ ამბობს, რომ რეფერენდუმის შემთხვევაში, ის გაერთიანებას მხარს დაუჭერდა.
სანდუმ საკუთარი პოზიცია რეგიონში არსებული რთული გეოპოლიტიკური ვითარებით ახსნა და თქვა, რომ დღევანდელ პირობებში მოლდოვისთვის დამოუკიდებლად გადარჩენა სულ უფრო რთული ხდება.
თბილისში აცხადებენ, რომ ეს არის კიდევ ერთი მაგალითი როგორ ასრულებენ გარე დაკვეთებს სხვადასხვა ქვეყნის ლიდერები, საკუთარი ხალხის, ქვეყნის სუვერენიტეტის და ეროვნული ინტერესების დაკარგვის ხარჯზე.
საქართველოს პარლამენტის თავმჯდომარის მოადგილის, ნინო წილოსანის განცხადებით, როდესაც მოლდოვის ლიდერები აპირებენ, რომ ქვეყანა რუმინეთის შემადგენლობაში შეიყვანონ, ძალიან ნათელია რა რისკებს გადაურჩა საქართველო.
“მაია სანდუს მსგავსი პოლიტიკოსები უჭერდნენ მხარს ჩვენს მოწინააღმდეგე რადიკალებს იმ პროცესებში, რომელსაც ისინი “ქართული ოცნების” ხელისუფლების წინააღმდეგ წარმართავდნენ. თუ რატომ უჭერდა მაია სანდუ მხარს ამ რადიკალებს და მათ შორის, სხვა ევროპოლიტიკოსები და ბიუროკრატია, ალბათ ადვილი მისახვედრია, რადგან მათთვის მოსაწონია მაია სანდუს გადაწყვეტილება და სურვილი, რომ რუმინეთის შემადგენლობაში შეიყვანოს მოლდოვა და მოლდოვას დაუკარგოს დამოუკიდებლობა. სწორედ ამის წინააღმდეგ ვიბრძოდით მთელი ამ პერიოდის მანძილზე და როდესაც ერთი მხრივ ვხედავთ მოლდოვა და მოლდოვის ლიდერები როგორ აპირებენ, რომ ის რუმინეთის შემადგენლობაში შეიყვანონ, ძალიან ნათელია რა რისკებს გადაურჩა საქართველო”, – განაცხადა ნინო წილოსანმა.