უკრაინის კეთილდღეობის გეგმის ფარგლებში, აშშ და ევროკავშირი ქვეყნის აღსადგენად, რუსეთთან ომის დასრულების შემდეგ, 800 მილიარდი დოლარის მოზიდვას გეგმავენ. დოკუმენტის რეალიზება 10 წლის განმავლობაში სურთ. ინფორმაციას ამის შესახებ გამოცემა POLITICO ავრცელებს.
ევროპელმა მაღალჩინოსნებმა და დიპლომატებმა გამოცემას განუცხადეს, რომ 18-გვერდიანი დოკუმენტი აღწერს 10-წლიან გეგმას, რომელიც უზრუნველყოფს უკრაინის აღდგენას და ევროკავშირში გაწევრიანების დაჩქარებულ გზას.
გამოცემის ინფორმაციით, უკრაინის აღდგენის ფინანსური სტრატეგია, რომელიც კეთილდღეობის გეგმაშია გაწერილი, 2040 წლამდეა გათვლილი და ითვალისწინებს პროექტების გაშვების ოპერატიულ, 100-დღიან გეგმას.
ამასთანავე, საინვესტიციო კომპანია BlackRock-ში, რომელიც უკრაინის აღდგენის საკითხებზე კონსულტაციებს უსასყიდლოდ ეწევა, აცხადებენ, რომ გარე კაპიტალის მოზიდვა გართულებული იქნება მანამ, სანამ საბრძოლო მოქმედებები გრძელდება.
დოკუმენტი ითვალისწინებს აშშ-ის ინვესტიციებს უკრაინის იშვიათ წიაღისეულში, ინფრასტრუქტურაში, ენერგეტიკასა და ტექნოლოგიურ პროექტებში.
კეთილდღეობის გეგმა წარმოადგენს 20-პუნქტიანი სამშვიდობო შეთანხმების ნაწილს, რომლის შეთანხმებასაც აშშ კიევსა და მოსკოვს შორის ცდილობს. მისი მთავარი ამოცანაა უზრუნველყოს უკრაინის გადასვლა საგანგებო დახმარების რეჟიმიდან მდგრად ეკონომიკურ განვითარებაზე.