ჩინეთის ცენტრალურ სამხედრო საბჭოში სი ძინპინის მოადგილეს, ჭანგ იოუსის ქვეყნის ბირთვული პროგრამის შესახებ ინფორმაციის აშშ-ში გაჟონვაში ადანაშაულებენ. ამის შესახებ ინფორმაციას ამერიკული გამოცემა „უოლ სთრით ჯოურნალი“ ჩინეთის შეიარაღებული ძალების მიერ ჩატარებულ დახურულ ბრიფინგზე დაყრდნობით ავრცელებს.
როგორც სტატიაში აღნიშნული, აღნიშნული ბრიფინგი 24 იანვარს გაიმართა.
მანამდე ჩინეთის ეროვნული თავდაცვის სამინისტრომ განაცხადა, რომ გენერალ ჭანგ იოუსის წინააღმდეგ გამოძიება დაიწყო, თუმცა საქმის დეტალები არ გაუსაჯაროებია.
განცხადებაში საუბარი იყო პარტიული დისციპლინისა და სახელმწიფო კანონების სერიოზულ დარღვევებზე. „უოლ სთრით ჯოურნალის“ ცნობით, ჭანგ იოუსიმ აშშ-ს გადასცა ჩინეთის ბირთვული იარაღის შესახებ მნიშვნელოვანი და გადამწყვეტი ტექნიკური მონაცემები. გარდა ამისა, ჩინეთის ხელისუფლება სწავლობს გენერლის საქმიანობას, იმ უწყების ზედამხედველის თანამდებობას, რომელიც პასუხისმგებელია სამხედრო ტექნიკის კვლევაზე, განვითარებასა და შესყიდვაზე.
გავრცელებული ცნობით, ჭანგ იოუსი ეჭვმიტანილია ქრთამის სანაცვლოდ შესყიდვების სისტემაში კონკრეტული პირების დაწინაურებაში, ასევე თანხის სანაცვლოდ ერთ-ერთი ოფიცრის ჩინეთის თავდაცვის მინისტრის თანამდებობაზე წარდგენაში. გენერალ ჭანგ იოუსის ასევე ბრალად ედება ჩინეთის მმართველი პარტიის შიგნით გავლენის ფარული ქსელების ფორმირებაში, რაც, გამოცემის ცნობით, პარტიის ერთიანობას უთხრიდა ძირს.
ამასთან, როგორც „უოლ სთრით ჯოურნალი“ წერს, ჭანგ იოუსის წინააღდმეგ სამხილები ასევე წარადგინა ჩინეთის ეროვნული ბირთვული კორპორაციის დირექტორმა, რომელიც გამოძიების ფიგურანტი ერთი კვირის წინ გახდა.
ვაშინგტონში ჩინეთის საელჩოს წარმომადგენელმა „უოლ სთრით ჯოურნალთან“ საკითხის კომენტირებისას განაცხადა, რომ გენერალ ჭანგ იოუსის წინააღმდეგ გამოძიების დაწყება მიუთითებს, რომ ჩინეთის მთავრობისთვის კორუფცია კატეგორიულად მიუღებელია და მას ებრძვის.