გერმანიის კანცლერი ფრიდრიხ მერცი „ევროპის სახალხო პარტიის“ ლიდერის, მანფრედ ვებერის წინადადებას უკრაინაში ომის შემდგომ სამშვიდობო პროცესში „ევროპული არმიის“ ჩართულობის შესახებ არ ეთანხმება. ინფორმაციას ამის შესახებ „პოლიტიკო“ ავრცელებს.
ხორვატიის დედაქალაქ ზაგრებში გამართულ „სახალხო პარტიის“ არაფორმალურ სამიტზე სიტყვით გამოსვლისას მერცი მიესალმა ვებერის მცდელობებს ევროკავშირის რეორგანიზაციის შესახებ, თუმცა აღნიშნა, რომ ეს იდეები ევროპის პრობლემების დაუყოვნებლივ გადაწყვეტას არ წარმოადგენს.
„ჩვენ ახლა არსებულ ამოცანებზე უნდა გავამახვილოთ ყურადღება“, – უპასუხა მერცმა ვებერის ინიციატივების შესახებ კითხვაზე.
მანფრედ ვებერმა ბოლო კვირების განმავლობაში არაერთი წინადადება წამოაყენა საერთაშორისო ასპარეზზე ევროკავშირის უფრო დიდი ძალაუფლების წარმოჩენისთვის. უკრაინაში „ევროპული დროშის“ ქვეშ მოქმედი ჯარისკაცების გარდა, მან ერთიანი ევროპელი ლიდერის თანამდებობის შექმნის ინიციატივა გააჟღერა, რაც ევროპული საბჭოს პრეზიდენტისა და ევროკომისიის პრეზიდენტის თანამდებობების გაერთიანებას გულისხმობს.