უნგრეთის პრემიერ-მინისტრი ვიქტორ ორბანი სოციალურ ქსელში უკრაინის პრეზიდენტის, ვოლოდიმირ ზელენსკის მიერ მიუნხენის უსაფრთხოების კონფერენციაზე გაკეთებულ განცხადებას გამოეხმაურა, სადაც ზელენსკიმ აღნიშნა, რომ „მხოლოდ ორბანს შეუძლია, იფიქროს მუცლის გაზრდაზე და არა ბუდაპეშტში რუსული ტანკების გამოჩენაზე“.
„ძვირფასო ვოლოდიმირ ზელენსკი, გმადლობთ უკრაინის ევროკავშირში გაწევრიანების მხარდასაჭერად კიდევ ერთი საარჩევნო გამოსვლისთვის. ეს დიდად დაეხმარება უნგრელებს ვითარების უფრო ნათლად დანახვაში. თუმცა არის რაღაც, რაც თქვენ არასწორად გესმით: ეს დებატები არც მე მეხება და არც თქვენ. ეს ეხება უნგრეთის, უკრაინისა და ევროპის მომავალს. სწორედ ამიტომ ვერ გახდებით ევროკავშირის წევრი“, – წერს ორბანი სოციალურ ქსელში.
ცნობისთვის, ზელენსკიმ კონფერენციაზე სიტყვით გამოსვლისას ასევე აღნიშნა, რომ ევროპის უსაფრთხოების გასაძლიერებლად პოლონეთი და ბალტიისპირეთის ქვეყნები ყველაფერს აკეთებენ და ერთადერთი, ვინც ამ საკითხზე არ ზრუნავს, უნგრეთის პრემიერ-მინისტრია.