ვფიქრობ, ჩვენ ომის დასრულება გვჭირდება და არა მისი გაგრძელება. ამ ბრძოლის გაგრძელება აღარ შეიძლება, – განაცხადა ვოლოდიმირ ზელენსკიმ Politico-სთან ინტერვიუში. უკრაინის პრეზიდენტმა რუსეთის ენერგოსისტემაზე სანქციების დაწესების აუცილებლობას გაუსვა ხაზი.
მისივე თქმით, სჯერა, რომ აშშ-ის პრეზიდენტს, დონალდ ტრამპს ამის გაკეთება შეუძლია. ზელენსკიმ თეთრი სახლის ლიდერს „ლუკოილისთვის“ სანქციების დაწესებისთვის მადლობაც გადაუხადა.
„მას შეუძლია ეს გზავნილი ევროპელებსაც მიაწოდოს. ევროპელებმა ბევრი რამ გააკეთეს, მაგრამ რუსეთის ბირთვულ ენერგეტიკას, „როსატომს“, მათ ხალხს, მათ ნათესავებსა და შვილებს, რომლებიც ევროპასა და აშშ-ში ცხოვრობენ, ევროპის უნივერსიტეტებში სწავლობენ და აშშ-ში უძრავ ქონებას ფლობენ, სანქციები მაინც არ შეახეს. მათ ყველგან აქვთ უძრავი ქონება, ჰყავთ შვილები და ნათესავები.
წადით უკან, რუსეთში. წადით სახლში. თქვენ არ სცემთ პატივს არავის ამერიკის შეერთებულ შტატებში. თქვენ პატივს არ სცემთ წესებს. თქვენ არ სცემთ პატივს დემოკრატიას. თქვენ არ სცემთ პატივს უკრაინას, ევროპას და ა.შ. წადით სახლში. რატომ ხართ აქ?! ეს არ არის სწორი. ასე რომ, ვფიქრობ, ტრამპმა უნდა გააკეთოს ის, რაც შეუძლია. მე ასე მგონია“, – აღნიშნა პრეზიდენტმა.