რუსეთი გამოიყენებს თავის სამხედრო-საზღვაო ფლოტს ბალტიისპირეთში ბლოკადის და სიტუაციის მშვიდობიანი გზით მოგვარების შეუძლებლობის შემთხვევაში. ამის შესახებ გაზეთ რუსეთის პრეზიდენტის თანაშემწემ და ამავდროულად რუსეთის საზღვაო კოლეგიის თავმჯდომარემ, ნიკოლაი პატრუშევმა განაცხადა. ინფორმაციას ამის შესახებ გამოცემა Deutsche Welle ავრცელებს.
„პირველ ნაბიჯად ჩვენ გამოვიყენებთ საყოველთაოდ აღიარებულ პოლიტიკურ-დიპლომატიურ და სამართლებრივ მექანიზმებს“, – განაცხადა პატრუშევმა. „თუ ამ სიტუაციის მშვიდობიანი გზით მოგვარება ვერ მოხერხდება, მაშინ ბლოკადას სამხედრო-საზღვაო ფლოტი გაარღვევს“, – დასძინა პატრუშევმა, რომელსაც 2000-იანი წლების დასაწყისში რუსეთის ფედერაციის უსაფრთხოების ფედერალური სამსახურის დირექტორის თანამდებობა ეკავა.
ნიკოლაი პატრუშევი ამტკიცებს, რომ ნატო „ფაქტობრივად ქმნის მრავალეროვნულ დაჯგუფებას, რომელიც ორიენტირებულია თავდასხმით მოქმედებებზე“.
პატრუშევის ვერსიით, ჩრდილოატლანტიკური ალიანსი გეგმავს კალინინგრადის ოლქის ბლოკირებას და ასევე რუსეთისთვის ზღვებზე წვდომის გადაკეტვას,
„ნუ დავივიწყებთ, რომ ევროპული დროშების ქვეშ ზღვებში უამრავი გემი დაცურავს. ჩვენთვისაც შეიძლება საინტერესო გახდეს, რა გადააქვთ მათ და საით“, – აღნიშნა რუსეთის პრეზიდენტის თანაშემწემ.